2329. වෙස්සභූ තම්හි සමයෙ භික්ඛුසඞ්ඝපුරක්ඛතො,
දෙසෙති අරියසච්චානි නිබ්බාපෙන්තො මහාජනං.

2330. පරමකාරුඤ්ඤපත්තොම්භි සමිතිං අගමාසහං,
සොහං නිසින්නකො සන්තො ධම්මස්සොසිං සත්ථුනො.

2331. තස්සාහං ධම්මං සුත්වාන දෙවලොකමගච්ඡහං,
තිංසකප්පානි දෙවෙසු අවසිං තත්ථහං පුරෙ.

2332. එකතිංසෙ ඉතො කප්පෙ යං සඤ්ඤමලභිං තදා,
දුග්ගතිං නාභිජානාමි සච්චසඤ්ඤායිදං ඵලං.

2333. ඡබ්බීසම්හි ඉතො කප්පෙ එකො ආසිං ජනාධිපො,
එකඵුසිතනාමෙන චක්කවත්තී මහබ්බලො.

2334. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2335. දුමග්ගෙ පංසුකූලිකං ලග්ගං දිස්වාන සත්ථුනො,
අඤ්ජලිං පග්ගහෙත්වාන පංසුකූලං අවන්දිහං.

2336. එකතිංසෙ ඉතො කප්පෙ යං සඤ්ඤමලභිං තදා,
දුග්ගතිං නාභිජානාමි බුද්ධපූජායිදං ඵලං.

2337. පඤ්චවීසෙ ඉතො කප්පෙ එකො ආසිං ජනාධිපො,
අමිතාභොති නාමෙන චක්කවත්තී මහබ්බලො.

2338. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2339. උදෙන්තං සතරංසිංව සිතරංසිංව භානුමං,
ව්යග්ඝූසභංව පවරං සුජාතං පබ්බතන්තරෙ.

2340. බුද්ධස්ස ආනුභාවො සො ජලතෙ පබ්බතන්තරෙ,
රංසෙ චිත්තං පසාදෙත්වා කප්පං සග්ගම්හි මොදහං.

2341. අවසෙසෙසු කප්පෙසු කුසලං සුකතං මයා,
තෙන චිත්තප්පසාදෙන බුද්ධානුස්සතියා පි ච.

2342. තිංසකප්පසහස්සෙතො යං සඤ්ඤමලභිං තදා,
දුග්ගතිං නාභිජානාමි බුද්ධසඤ්ඤායිදං ඵලං.

2343. සත්තපඤ්ඤාසකප්පම්හි එකො ආසිං ජනාධිපො,
සුජාතො නාම නාමෙන චක්කවත්ති මහබ්බලො.

2344. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2345. අස්සත්ථෙ හරිතොභාසෙ සංවිරූළ්හම්හි පාදපෙ,
එකං බුද්ධගතං සඤ්ඤං අලභිස්ස පතිස්සතො.

2346. එකතිංසෙ ඉතො කප්පෙ යං සඤ්ඤමලභිං තදා,
තස්සා සඤ්ඤාය වාහසා පත්තො මෙ ආසවක්ඛයො.

2347. ඉතො තෙරසකප්පම්හි ධනිට්ඨො නාම ඛත්තියො,
සත්තරතනසම්පන්නො චක්කවත්තී මහබ්බලො.

2348. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.