2260. සුමඞ්ගලොති නාමෙන සයම්භු අපරාජිතො,
පවනා නික්ඛමිත්වාන නගරං පාවිසී ජිනො.

2261. පිණ්ඩචාරං චරිත්වාන නික්ඛම්ම නගරා මුනි,
කතකිච්චොව සම්බුද්ධො සො වසී වනමන්තරෙ.

2262. කිඞ්කණිපුප්ඵං පග්ගය්හ බුද්ධස්ස අභිරොපයිං,
පසන්නචිත්තො සුමනො සයම්භුස්ස මහෙසිනො.

2263. චතුනවුතෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි බුද්ධපූජායිදං ඵලං.

2264. ඡළාසීතිම්භිතො කප්පෙ අපිලාපිය නාමකො,
සත්තරතනසම්පන්නො චක්කවත්තී මහබ්බලො.

2265. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2266. පදුමුත්තරො නාම ජිනො ආහුතීනං පටිග්ගහො,
පවනා කික්ඛමිත්වාන විහාරං යාති චක්ඛුමා.

2267. උභො හත්ථෙහි පග්ගය්හ යූථිකං පුප්ඵමුත්තමං,
බුද්ධස්ස අභිරොපෙසිං මෙත්තචිත්තස්ස තාදිනො.

2268. තෙන චිත්තප්පසාදෙන අභිභොත්වාන සම්පදා,
කප්පානං සතසහස්සං දුග්ගතිං නූපපජ්ජහං.

2269. ඉතො පඤ්ඤාසකප්පෙසු එකො ආසිං ජනාධිපො,
සමිත්තනන්දනො නාම චක්කවත්තී මහබ්බලො.

2270. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

තමාලී තිණසන්ථාරො ඛණ්ඩඵුල්ලී අසොකියො
අඞ්කොලකී කිසලයො තින්දුකො නෙලපුප්ඵියො
කිඞ්කණිකො යූථිකො ච ගාථා පඤ්ඤාස අට්ඨ ච.

භික්ඛාදායී පරිවාරො සෙරෙය්යො සොභිතො තථා
ඡත්තො ච බන්ධුජීවො ච සුපාරිචරියොපි ච
කුමුදො කුටජො චෙව තමාලී දසමො කතො.
ඡසතානි ච ගාථානං ඡසට්ඨි ච තතුත්තරිං.

2271. කණිකාරං පුප්ඵිතං දිස්වා ඔචිනිත්වානහං තදා,
තිස්සස්ස අභිරොපෙසිං ඔඝතිණ්ණස්ස තාදිනො.

2272. ද්වෙනවුතෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි බුද්ධපූජායිදං ඵලං.

2273. පඤ්චතිංසෙ ඉතො කප්පෙ අරුණපාණීති විස්සුතො,
සත්තරතනසම්පන්නො චක්කවත්තී මහබ්බලො.

2274. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2275. සුවණ්ණවණ්ණො භගවා සතරංසී පතාපවා.
චඞ්කමනං සමාරූළ්හො මෙත්තචිත්තො සිඛීසභො.

2276. පසන්නචිත්තො සුමනො වන්දිත්වා ඤාණමුත්තමං,
මිනෙලපුප්ඵං පග්ගය්හ බුද්ධස්ස අභිරොපයිං.

2277. එකතිංසෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි බුද්ධපූජායිදං ඵලං.