2230. තීවරායං පුරෙ රම්මෙ රාජුය්යානමහූ තදා,
උය්යානපාලො තත්ථාසිං රඤ්ඤො බද්ධචරො අහං.

2231. පදුමො නාම නාමෙන සයම්භූ සප්පභො අහු,
නිසින්නං පුණ්ඩරීකම්භි ඡායා න ජහි තං මුනිං.

2232. අසොකං පුප්ඵි තං දිස්වා පිණ්ඩිභාරං සුදස්සනං,
බුද්ධස්ස අභිරොපෙසිං ජලජුත්තමනාමිනො.

2233. චතුනවුතෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි බුද්ධපූජායිදං ඵලං.

2234. සත්තතිංසම්හිතො කප්පෙ සොළස අරුණඤ්ජහා,
සත්තරතනසම්පන්නො චක්කවත්තී මහබ්බලා.

2235. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2236. අඞ්කොලං පුප්ඵිතං දිස්වා මාලාවරං සකොසකං,
ඔචිනිත්වාන තං පුප්ඵං අගමං බුද්ධසන්තිකං.

2237. සිද්ධත්ථො තම්හි සමයෙ පටිලීනො මහාමුනි,
මුහුත්තං පතිමානෙත්වා ගුහායං පුප්ඵමොකිරිං.

2238. චතුනවුතෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි බුද්ධපූජායිදං ඵලං.

2239. ඡත්තිංසම්භි ඉතො කප්පෙ ආසෙකො දෙවගජ්ජිතො,
සත්තරතනසම්පන්නො චක්කවත්තී මහබ්බලො.

2240. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2241. නගරෙ ද්වාරවතියා මාලාවච්ඡො මමං අහු,
උදපානො ච තත්ථෙව පාදපානං විරොහනො.

2242. සබලෙන උපත්ථද්ධො සිද්ධත්ථො අපරාජිතො,
මමානුකම්පමානො සො ගච්ඡතෙ අනිලඤ්ජසෙ.

2243. අඤ්ඤං කිඤ්චි න පස්සාමි පූජායොග්ගං මහෙසිනො,
අසොකපල්ලවං දිස්වා ආකාසෙ උක්ඛිපිං අහං.

2244. බුද්ධස්ස තෙ කිසලයා ගච්ඡතො යන්ති පච්ඡතො,
සොහං දිස්වාන තං ඉද්ධිං අහො බුද්ධස්සුළාරතා.

2245. චතුනවුතෙ ඉතො කප්පෙ පල්ලවං අභිරොපයිං,
දුග්ගතිං නාභිජානාමි බුද්ධපූජායිදං ඵලං.

2246. සත්තවීසෙ ඉතො කප්පෙ එකො එකස්සරො අහු,
සත්තරතනසම්පන්නො චක්කවත්ති මහබ්බලො.

2247. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.