2056. සිද්ධත්ථො නාම භගවා ලොකජෙට්ඨො නරාසභො,
පුරක්ඛතො සාවකෙහි නගරං පටිපජ්ජථ.

2057. රඤ්ඤො අන්තෙපුරෙ ආසිං ගොපකො අභිසම්මතො,
පාසාදෙ උපවිට්ඨොහං අද්දසං ලොකනායකං.

2058. කණවෙරං ගහෙත්වාන භික්ඛුසංඝෙ සමොකිරිං,
බුද්ධස්ස විසුං කත්වාන තතො භිය්යො සමොකිරිං.

2059. චතුනවුතෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි පුප්ඵපූජායිදං ඵලං.

2060. සත්තාසීතිම්හිතො කප්පෙ චතුරො ආසුං මහිද්ධිකා,
සත්තරතනසම්පන්නා චක්කවත්තී මහබ්බලා.

2061. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2062. තිස්සස්ස ඛො භගවතො පුබ්බෙ ඵලමදාසහං,
නාළිකෙරඤ්ච පාදාසිං ඛජ්ජකං අභිසම්මතං.

2063. බුද්ධස්ස තමහං දත්වා තිස්සස්ස තු මහෙසිනො,
මොදාමහං කාමකරී උපපජ්ජිං යදිච්ඡකං.

2064. ද්වෙ නවුතෙ ඉතො කප්පෙ යං දානමදදිං තදා,
දුග්ගතිං නාභිජානාමි ඵලදානස්සිදං ඵලං.

2065. ඉතො තෙරසකප්පම්හි රාජා ඉන්දසමො අහුං,
සත්තරතනසම්පන්නො චක්කවත්තී මහබ්බලො.

2066. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

2067. අත්ථදස්සී තු භගවා ලොකජෙට්ඨො නරාසභො,
අබ්භුග්ගන්ත්වාන වෙහාසං ගච්ඡතෙ අනිලඤ්ජසෙ.

2068. යම්හි දෙසෙ ඨිතො සත්ථා අබ්භුග්ගඤ්ඡි මහාමුනි,
තාහං දෙසං අපූජෙසිං පසන්නො සෙහි පාණිහි.

2069. අට්ඨාරසෙ කප්පසතෙ අද්දසං යං මහාමුනිං,
දුග්ගතිං නාභිජානාමි දෙසපූජායිදං ඵලං.

2070. එකාදසෙ කප්පසතෙ ගොසුජාත සනාමකො,
සත්තරතනසම්පන්නො චක්කවත්තී මහබ්බලො.

2071. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.