1961. නිබ්බුතෙ ලොකනාථම්භි අහුතීනං පටිග්ගහෙ,
සිද්ධත්ථම්හි භගවති මහාථූපමහො අහු.

1962. මහෙ පවත්තමානම්භි සිද්ධත්ථස්ස මහෙසිනො,
උම්මාපුප්ඵං ගහෙත්වාන ථූපම්හි අභිරොපයිං.

1963. චතුනවුතෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි ථූපපූජායිදං ඵලං.

1964. ඉතො ච නවමෙ කප්පෙ සොමදෙවසනාමකා,
පඤ්චාසීති ‘සු රාජානො චක්කවත්තී මහබ්බලා.

1965. පටිසම්භිදා -පෙ- කතං බුද්ධස්ස සාසනං.

1966. අනොමදස්සීමුනිනො බොධිවෙදිමකාස’හං,
සුධාය පිණ්ඩං දත්වාන පාතිකම්මමකාය හං.

1967. දිස්වා තං සුකතං කම්මං අනොමදස්සී නරුත්තමො,
භික්ඛුසංඝෙ ඨිතො සත්ථා ඉමා ගාථා අභාසථ:

1968. “ඉමිනා සුධාකම්මෙන චෙතනාපණිධීහි ච,
සම්පත්තිං අනුභොත්වාන දුක්ඛස්සන්තං කරිස්සති.”

1969. පසන්න මුඛවණ්ණොම්හි එකග්ගො සුසමාහිතො,
ධාරෙමි අන්තිමං දෙහං සම්මාසම්බුද්ධසාසනෙ.

1970. ඉතො කප්පසතෙ ආසිං පරිපුණ්ණෙ අනූනකෙ,
රාජා සබ්බඝනො නාම චක්කවත්තී මහබ්බලො.

1971. පටිසම්භිදා -පෙ- කතං බුද්ධස්ස සාසනං.

1972. උත්තරිත්වාන නදිකං වනං ගච්ඡති චක්ඛුමා,
තමද්දසාසිං සම්බුද්ධං සිද්ධත්ථං වරලක්ඛණං.

1973. කුද්දාලපිටකමාදාය සමං කත්වාන තං පථං,
සත්ථාරං අභිවාදෙත්වා සකං චිත්තං පසාදයිං.

1974. චතුනවුතෙ ඉතො කප්පෙ යං කම්මමකරිං තදා,
දුග්ගතිං නාභිජානාමි මග්ගදානස්සිදං ඵලං.

1975. සත්තපඤ්ඤාසකප්පම්හි එකො ආසිං ජනාධිපො,
නාමෙන සුප්පබුද්ධොති නායකො සො නරිස්සරො.

1976. පටිසම්භිදා -පෙ- කතං බුද්ධස්ස සාසනං.