1909. කණිකාරංව ජොතන්තං නිසින්නං පබ්බතන්තරෙ,
ඔභාසෙන්තං දිසා සබ්බා ඔසධිං විය තාරකං.

1910. තයො මාණවකා ආසුං සකෙ සිප්පෙ සුසික්ඛිතා,
ඛාරිභාරං ගහෙත්වාන අන්වෙන්ති මම පච්ඡතො.

1911. පුටකෙ සත්ත පුප්ඵානි නික්ඛිත්තානි තපස්සිනා,
ගහෙත්වා තානි ඤාණම්භි වෙස්සභුස්සාභිරොපයිං.

1912. එකතිංසෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි ඤාණපූජායිදං ඵලං.

1913. එකූනතිංසෙ කප්පම්හි විපුලාභ සනාමකො,
සත්තරතනසම්පන්නො චක්කවත්තී මහබ්බලො.

1914. පටිසම්භිදා -පෙ- කතං බුද්ධස්ස සාසනං.

1915. විසාලමාලෙ ආසීනො අද්දසං ලොකනායකං,
ඛීණාසවං බලප්පත්තං භික්ඛුසඞ්ඝපුරක්ඛතං.

1916. සතසහස්සා තෙවිජ්ජා ඡළභිඤ්ඤා මහිද්ධිකා,
පරිවාරෙන්ති සම්බුද්ධං කො දිස්වා නප්පසීදති.

1917. ඤාණෙ උපනිධා යස්ස න විජ්ජති සදෙවකෙ,
අනන්තඤාණං සම්බුද්ධං කො දිස්වා නප්පසීදති.

1918. ධම්මකායඤ්ච දීපෙන්තං කෙවලං රතනාකරං,
විකොපෙතුං න සක්කොන්ති කො දිස්වා නප්පසීදති.

1919. ඉමාහි තීහි ගාථාහි නාරදො සරගච්ඡියො,
පදුමුත්තරං ථවිත්වාන සම්බුද්ධං අපරාජිතං.

1920. තෙන චිත්තප්පසාදෙන බුද්ධසන්ථවනෙන ච,
කප්පානං සතසහස්සං දුග්ගතිං නුපපජ්ජහං.

1921. ඉතො තිංසෙ කප්පසතෙ සුමිත්තො නාම ඛත්තියො,
සත්තරතනසම්පන්නො චක්කවත්තී මහබ්බලො.

1922. පටිසම්භිදා -පෙ- කතං බුද්ධස්ස සාසනං.

1923. නාරදො ඉති මෙ නාමං කෙසවො ඉති මං විදූ,
කුසලාකුසලං එසං අගමං බුද්ධසන්තිකං.

1924. මෙත්තචිත්තො කාරුණිකො අත්ථදස්සී මහාමුනි,
අස්සාසයන්තො සත්තෙ සො ධම්මං දෙසෙති චක්ඛුමා.

1925. සකං චිත්තං පසාදෙත්වා සිරෙ කත්වාන අඤ්ජලිං,
සත්ථාරං අභිවාදෙත්වා පක්කාමිං පාචිනාමුඛො.

1926. සත්තරසෙ කප්පසතෙ රාජා ආසිං මහීපති,
අමිත්තතාපනො නාම චක්කවත්තී මහබ්බලො.

1927. පටිසම්භිදා -පෙ- කතං බුද්ධස්ස සාසනං.