1849. පබ්බතෙ හිමවන්තම්හි වසාමි පබ්බතන්තරෙ,
පුලිනං සොභනං දිස්වා බුද්ධසෙට්ඨං අනුස්සරිං.

1850. “ඤාණෙ උපනිධා නත්ථි සඞ්ගාමං නත්ථි සත්ථුනො,
සබ්බං ධම්මං අභිඤ්ඤාය ඤාණෙන අධිමුච්චති.

1851. නමො තෙ පුරිසාජඤ්ඤ නමො තෙ පුරිසුත්තම,
ඤාණෙන තෙ සමො නත්ථි යාවතා ඤාණමුත්තමං”.

1852. ඤාණෙ චිත්තං පසාදෙත්වා කප්පං සග්ගම්හි මොදහං,
අවසෙසෙසු කප්පෙසු කුසලං කරිතං මයා.

1853. එකනවුතෙ ඉතො කප්පෙ යං සඤ්ඤමලභිං තදා,
දුග්ගතිං නාභිජානාමි ඤාණසඤ්ඤායිදං ඵලං.

1854. ඉතො තෙසත්තතිකප්පෙ එකො පුලිනපුප්ඵියො,
සත්තරතනසම්පන්නො චක්කවත්තී මහබ්බලො.

1855. පටිසම්භිදා -පෙ- කතං බුද්ධස්ස සාසනං.

1856. සුවණ්ණවණ්ණො සම්බුද්ධො විපස්සී දක්ඛිණාරහො,
පුරක්ඛතො සාවකෙහි ආරාමා අභිනික්ඛමි.

1857. දිස්වාන’හං බුද්ධසෙට්ඨං සබ්බඤ්ඤුං තමනාසකං,
පසන්නචිත්තො සුමනො ගන්ධපුප්ඵං අපූජයිං.

1858. තෙන චිත්තප්පසාදෙන දිපදින්දස්ස තාදිනො,
හට්ඨො හට්ඨෙන චිත්තෙන පුන වන්දිං තථාගතං.

1859. එකනවුතෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි බුද්ධපූජායිදං ඵලං.

1860. එකතාළීසි’තො කප්පෙ චරණො නාම ඛත්තියො,
සත්තරතනසම්පන්නො චක්කවත්තී මහබ්බලො.

1861. පටිසම්භිදා -පෙ- කතං බුද්ධස්ස සාසනං.

1862. හිමවන්තස්ස අවිදූරෙ ගොතමො නාම පබ්බතො,
නානාරුක්ඛෙහි සඤ්ඡන්නො මහාභූතගණාලයො.

1863. වෙමජ්ඣම්භි ච තස්සාසි අස්සමො අභිනිම්මිතො,
පුරක්ඛතො සසිස්සෙහි වසාමි අස්සමෙ අහං.

1864. “ආයන්තු මෙ සිස්සගණා පදුමං ආහරන්තු මෙ,
බුද්ධපූජං කරිස්සාම දිපදින්දස්ස තාදිනො”

1865. එවන්ති තෙ පටිස්සුත්වා පදුමං ආහරිංසු මෙ,
තත්ථ නිමිත්තං කත්වා’හං බුද්ධස්ස අභිරොපයිං.