1767. අජ්ඣායකො මන්තධරො තිණ්ණං වෙදාන පාරගූ,
අබ්භොකාසෙ ඨිතො සන්තො අද්දසං ලොකනායකං.

1768. සීහං යථා වනචරං ව්යග්ඝරාජංව නිත්තසං,
තිධා පභින්නමාතඞ්ගං කුඤ්ජරංව මහෙසිනං.

1769. සෙරෙය්යකං ගහෙත්වාන ආකාසෙ උක්ඛිපිං අහං,
බුද්ධස්ස ආනුභාවෙන පරිවාරෙන්ති සබ්බතො.

1770. අධිට්ඨාසි මහාවීරො සබ්බඤ්ඤූ ලොකනායකො,
සමන්තා පුප්ඵච්ඡදනා ඔකිරිංසු නරාසභං.

1771. තතො සා පුප්ඵකඤ්චුකා අන්තොවණ්ටා බහීමුඛා,
සත්තාහං ඡදනං හුත්වා තතො අන්තරධායථ.

1772. තං ච අච්ඡරියං දිස්වා අබ්භුතං ලොමහංසනං,
බුද්ධෙ චිත්තං පසාදෙසිං සුගතෙ ලොකනායකෙ.

1773. තෙන චිත්තප්පසාදෙන සුක්කමූලෙන චොදිතො,
කප්පානං සතසහස්සං දුග්ගතිං නුපපජ්ජහං.

1774. පණ්ණරසසහස්සම්භි කප්පානං පඤ්චවීස තෙ,
චිත්තමාලාසනාමා ච චක්කවත්තී මහබ්බලා.

1775. පටිසම්භිදා චතස්සො විමොක්ඛා’පි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

1776. හිමවන්තස්සාවිදූරෙ කුක්කුටො නාම පබ්බතො,
වෙමජ්ඣෙ තස්ස වසති බ්රාහ්මණො මන්තපාරගූ.

1777. පඤ්ච සිස්සසහස්සානි පරිවාරෙන්ති මං සදා,
පුබ්බුට්ඨායී ච තෙ ආසුං මන්තෙසු ච විසාරදා.

1778. බුද්ධො ලොකෙ සමුප්පන්නො තං විජානාථ නො භවං,
අසීති ව්යඤ්ජනානස්ස බත්තිංස වරලක්ඛණා,
බ්යාමප්පභො ජිනවරො ආදිච්චොව විරොචති.

1779. සිස්සානං වචනං සුත්වා බ්රාහ්මණො මන්තපාරගූ,
අස්සමා අභිනික්ඛම්ම දිසං පුච්ඡති සිස්සකෙ.
යම්හි දෙසෙ මහාවීරො වසතී ලොකනායකො.

1780. තාහං දිසං නමස්සිස්සං ජිනං අප්පටිපුග්ගලං,
උදග්ගචිත්තො සුමනො පූජෙසිං තං තථාගතං.

1781. එථ සිස්සා ගමිස්සාම දක්ඛිස්සාම තථාගතං,
වන්දිත්වා සත්ථුනො පාදෙ සොස්සාම ජිනසාසනං.

1782. එකාහං අභිනික්ඛම්ම ව්යාධිං පටිලභිං අහං,
ව්යාධිනා පීළිතො සන්තො සාලං වෙසයිතුං ගමිං.

1783. සබ්බෙ සිස්සෙ සමානෙත්වා අපුච්ඡිං තෙ තථාගතං,
කීදිසං ලොකනාථස්ස ගුණං පරමබුද්ධිනො.