1806. ජායමානෙ විපස්සිම්හි නිමිත්තං ව්යාකරිං අහං,
නිබ්බාපයඤ්ච ජනතං බුද්ධො ලොකෙ භවිස්සති.

1807. යස්මිඤ්ච ජායමානස්මිං දසසහස්සී පකම්පති,
සො’දානි භගවා සත්ථා ධම්මං දෙසෙති චක්ඛුමා.

1808. යස්මිඤ්ච ජායමානස්මිං ආලොකො විපුලො අහූ,
සො’දානි භගවා සත්ථා ධම්මං දෙසෙති චක්ඛුමා.

1809. යස්මිං ච ජායමානස්මිං සරිතායො න සන්දිසුං,
සො’දානි භගවා සත්ථා ධම්මං දෙසෙති චක්ඛුමා.

1810. යස්මිං ච ජායමානස්මිං අවීචග්ගි න පජ්ජලි,
සො’දානි භගවා සත්ථා ධම්මං දෙසෙති චක්ඛුමා.

1811. යස්මිං ච ජායමානස්මිං පක්ඛිසංඝො න සඤ්චරි,
සො’දානි භගවා සත්ථා ධම්මං දෙසෙති චක්ඛුමා.

1812. යස්මිං ච ජායමානස්මිං වාතක්ඛන්ධො න වායති,
සො’දානි භගවා සත්ථා ධම්මං දෙසෙති චක්ඛුමා.

1813. යස්මිං ච ජායමානස්මිං සබ්බරතනානි ජොතිසුං,
සො’දානි භගවා සත්ථා ධම්මං දෙසෙති චක්ඛුමා.

1814. යස්මිං ච ජායමානස්මිං සත්තා’සුං පදවික්කමා,
සො’දානි භගවා සත්ථා ධම්මං දෙසෙති චක්ඛුමා.

1815. ජාතමත්තො ච සම්බුද්ධො දිසා සබ්බා විලොකයි,
වාචාසභිමුදීරෙසි එසා බුද්ධාන ධම්මතා.

1816. සංවෙජයිත්වා ජනතං ථවිත්වා ලොකනායකං,
සම්බුද්ධං අභිවාදෙත්වා පක්කාමිං පාචිනාමුඛො.

1817. එකනවුතෙ ඉතො කප්පෙ යං බුද්ධමභිථොමයිං,
දුග්ගතිං නාභිජානාමි ථොමනාය ඉදං ඵලං.

1818. ඉතො නවුතිකප්පම්භි සම්මුඛාථවිකව්හයො,
සත්තරතනසම්පන්නො චක්කවත්තී මහබ්බලො.

1819. පඨවිදුන්දුභී නාම එකූනනවුතිම්භි’තො,
සත්තරතනසම්පන්නො චක්කවත්තී මහබ්බලො.

1820. අට්ඨාසීතිම්හි’තො කප්පෙ ඔභාසො නාම ඛත්තියො,
සත්තරතනසම්පන්නො චක්කවත්තී මහබ්බලො.

1821. සත්තාසීතිම්හි’තො කප්පෙ සරිතච්ඡෙදනව්හයො,
සත්තරතනසම්පන්නො චක්කවත්තී මහබ්බලො.

1822. අග්ගිනිබ්බාපනො නාම කප්පානං ඡළසීතියා,
සත්තරතනසම්පන්නො චක්කවත්තී මහබ්බලො.

1823. ගතිපච්ඡෙදනො නාම කප්පානං පඤ්චසීතියා,
සත්තරතනසම්පන්නො චක්කවත්තී මහබ්බලො.

1824. රාජා වාතසමො නාම කප්පානං චුල්ලසීතියා,
සත්තරතනසම්පන්නො චක්කවත්තී මහබ්බලො.

1825. රතනපජ්ජලො නාම කප්පානං තෙඅසීතියා,
සත්තරතනසම්පන්නො චක්කවත්තී මහබ්බලො.