1707. වරුණො නාම නාමෙන දෙවරාජා අහං තදා,
උපට්ඨහෙසිං සම්බුද්ධං සයොග්ගබලවාහනො.

1708. නිබ්බුතෙ ලොකනාථම්හි අත්ථදස්සිනරුත්තමෙ,
තුරියං සබ්බමාදාය අගමං බොධිමුත්තමං.

1709. වාදිතෙන ච නච්චෙන සම්මතාලසමාහිතො,
සම්මුඛා විය සම්බුද්ධං උපට්ඨිං බොධිමුත්තමං.

1710. උපට්ඨහිත්වා තං බොධිං ධරණීරුහපාදපං,
පල්ලඞ්කං ආභුජිත්වාන තත්ථ කාලකතො අහං.

1711. සකකම්මාභිරද්ධො’හං පසන්නො බොධිමුත්තමෙ,
තෙන චිත්තප්පසාදෙන නිම්මානං උපපජ්ජහං.

1712. සට්ඨි තුරියසහස්සානි පරිවාරෙන්ති මං සදා,
මනුස්සෙසු ච දෙවෙසු වත්තමානං භවාභවෙ.

1713. සුබාහු නාම නාමෙන චතුත්තිංසාසු ඛත්තියා
සත්තරතනසම්පන්නා පඤ්ච කප්පසතෙ ඉතො.

1714. තිවිධග්ගී නිබ්බුතා මය්හං භවා සබ්බෙ සමූහතා,
ධාරෙමි අන්තිමං දෙහං සම්මාසම්බුද්ධසාසනෙ.

1715. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

1716. විපස්සී නාම භගවා ලොකජෙට්ඨො නරාසභො,
නිසින්නො ජනකායස්ස දෙසෙති අමතං පදං.

1717. තස්සාහං ධම්මං සුත්වාන දිපදින්දස්ස තාදිනො,
සොණ්ණපුප්ඵානි චත්තාරි බුද්ධස්ස අභිරොපයිං.

1718. සුවණ්ණච්ඡදනං ආසි යාවතා පරිසා තදා,
බුද්ධාභා ච සුවණ්ණාහා ආලොකො විපුලො අහු.

1719. උදග්ගචිත්තො සුමනො වෙදජාතො කතඤ්ජලී,
විත්තිසඤ්ජනනො තෙසං දිට්ඨධම්මසුඛාවහො.

1720. ආයාචිත්වාන සම්බුද්ධං වන්දිත්වාන ච සුබ්බතං,
පාමොජ්ජං ජනයිත්වාන සකං භවනුපාගමිං.

1721. භවනෙ උපවිට්ඨො’හං බුද්ධසෙට්ඨං අනුස්සරිං,
තෙන චිත්තප්පසාදෙන තුසිතං උපපජ්ජහං.

1722. එකනවුතෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි බුද්ධපූජායිදං ඵලං.

1723. සොළසා’සිංසු රාජානො නෙමිසම්මත නාමකා,
තෙතාළීසෙ ඉතො කප්පෙ චක්කවත්තී මහබ්බලා.

1724. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.