1758. ජායන්තස්ස විපස්සිස්ස අලොකො විපුලො අහු,
පඨවී ච පකම්පිත්ථ සසාගරා සපබ්බතා.

1759. නෙමිත්තා ච වියාකංසු බුද්ධො ලොකෙ භවිස්සති,
අග්ගො ච සබ්බසත්තානං ජනතං උද්ධරිස්සති.

1760. නෙමිත්තානං සුණිත්වාන ජාතිපූජමකාසහං,
එදිසා පූජනා නත්ථි යාදිසා ජාතිපූජනා.

1761. සංවරිත්වාන කුසලං සකං චිත්තං පසාදයිං,
ජාතිපූජං කරිත්වාන තත්ථ කාලකතො අහං.

1762. යං යං යොනුපපජ්ජාමි දෙවත්තං අථ මානුසං,
සබ්බෙ සත්තෙ අතිභොමි ජාතිපූජායිදං ඵලං.

1763. ධාතියො මං උපට්ඨන්ති මම චිත්තවසානුගා,
න තා සක්කොන්ති කොපෙතුං ජාතිපූජායිදං ඵලං.

1764. එකනවුතෙ ඉතො කප්පෙ යං පූජමකරිං තදා,
දුග්ගතිං නාභිජානාමි ජාතිපූජායිදං ඵලං.

1765. සුපාරිචාරියා නාම චතුත්තිංස ජනාධිපා,
ඉතො තතියකප්පම්භි චක්කවත්තී මහබ්බලා.

1766. පටිසම්භිදා චතස්සො විමොක්ඛා’පි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

පරිවාර සුමඞ්ගලා සරණාසන පුප්ඵකා,
චිතපූජී බුද්ධසඤ්ඤී මග්ගුපට්ඨාන ජාතිනා,
ගාථායො නවුතී වුත්තා ගණිතායො විභාවිහි.

1767. අජ්ඣායකො මන්තධරො තිණ්ණං වෙදාන පාරගූ,
අබ්භොකාසෙ ඨිතො සන්තො අද්දසං ලොකනායකං.

1768. සීහං යථා වනචරං ව්යග්ඝරාජංව නිත්තසං,
තිධා පභින්නමාතඞ්ගං කුඤ්ජරංව මහෙසිනං.

1769. සෙරෙය්යකං ගහෙත්වාන ආකාසෙ උක්ඛිපිං අහං,
බුද්ධස්ස ආනුභාවෙන පරිවාරෙන්ති සබ්බතො.

1770. අධිට්ඨාසි මහාවීරො සබ්බඤ්ඤූ ලොකනායකො,
සමන්තා පුප්ඵච්ඡදනා ඔකිරිංසු නරාසභං.

1771. තතො සා පුප්ඵකඤ්චුකා අන්තොවණ්ටා බහීමුඛා,
සත්තාහං ඡදනං හුත්වා තතො අන්තරධායථ.