1646. පදුමුත්තරබුද්ධස්ස ලොකජෙට්ඨස්ස තාදිනො,
තිණත්ථරෙ නිසින්නස්ස උපසන්තස්ස තාදිනො.

1647. නළමාලං ගහෙත්වාන බන්ධිත්වා වීජනිං අහං,
බුද්ධස්ස උපනාමෙසිං දිපදින්දස්ස තාදිනො.

1648. පටිග්ගහෙත්වා සබ්බඤ්ඤූ වීජනිං ලොකනායකො,
මම සඞ්කප්පමඤ්ඤාය ඉමං ගාථං අභාසථ:

1649. “යථා මෙ කායො නිබ්බාති පරිළාහො න විජ්ජති,
තථෙව තිවිධග්ගීහි චිත්තං තව විමුච්චතු.”

1650. සබ්බෙ දෙවා සමාගච්ඡුං යෙ කෙචි වනනිස්සිතා
‘සොස්සාම බුද්ධවචනං හාසයන්තං ච දායකං’.

1651. නිසින්නො භගවා තත්ථ දෙවසංඝපුරක්ඛතො,
දායකං සම්පහංසෙන්තො ඉමා ගාථා අභාසථ:

1652. “ඉමිනා වීජනිදානෙන චිත්තස්ස පණිධීහි ච,
සුබ්බතො නාම නාමෙන චක්කවත්තී භවිස්සති.

1653. තෙන කම්මාවසෙසෙන සුක්කමූලෙන චොදිතො,
මාලුතො නාම නාමෙන චක්කවත්තී භවිස්සති.

1654. ඉමිනා වීජනිදානෙන සම්මානවිපුලෙන ච,
කප්පසතසහස්සම්හි දුග්ගතිං නූපපජ්ජති.”

1655. තිංසකප්පසහස්සම්හි සුබ්බතා අට්ඨතිංස තෙ,
එකූනතිංසසහස්සෙ අට්ඨ මාලුතනාමකා.

1656. පටිසම්භිදා චතස්සො විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

1657. කානනං වනමොගය්හ අප්පසද්දං නිරාකුලං,
සීහාසනං මයා දින්නං අත්ථදස්සිස්ස තාදිනො.

1658. මාලහත්ථං ගහෙත්වාන කත්වා ච නං පදක්ඛිණං,
සත්ථාරං පයිරුපාසිත්වා පක්කාමිං උත්තරාමුඛො.

1659. තෙන කම්මෙන දිපදින්දෙ ලොකජෙට්ඨෙ නරාසභෙ,
සන්නිබ්බාපෙමි අත්තානං භවා සබ්බෙ සමූහතා.

1660. අට්ඨාරසෙ කප්පසතෙ යං දානමදදිං තදා,
දුග්ගතිං නාභිජානාමි සීහාසනස්සිදං ඵලං.

1661. ඉතො සත්තකප්පසතෙ සන්නිබ්බාපක ඛත්තියො,
සත්තරතනසම්පන්නො චක්කවත්තී මහබ්බලො.

1662. පටිසම්භිදා චතස්සො විමොක්ඛා’පි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.