1611. සුවණ්ණවණ්ණං සම්බුද්ධං ආහුතීනං පටිග්ගහං,
පවනා අභිනික්ඛන්තං වනා නිබ්බනමාගතං.

1612. කටච්ඡුභික්ඛං පාදාසිං සිද්ධත්ථස්ස මහෙසිනො,
පඤ්ඤස්ස උපසන්තස්ස මහ වීරස්ස තාදිනො.

1613. පදෙනානුපදං යන්තං නිබ්බාපෙන්තෙ මහාජනං,
උළාරා විත්ති මෙ ජාතා බුද්ධෙ ආදිච්චබන්ධුනි.

1614. චතුනවුතෙ ඉතො කප්පෙ යං දානමදදිං තදා,
දුග්ගතිං නාභිජානාමි භික්ඛාදානස්සිදං ඵලං.

1615. සත්තාසීතිම්හි’තො කප්පෙ මහාරෙණුසනාමකා,
සත්තරතනසම්පන්නා සත්තෙ’ව චක්කවත්තිනො.

1616. පටිසම්භිදා -පෙ- කතං බුද්ධස්ස සාසනං.

1617. සුවණ්ණවණ්ණං සම්බුද්ධං නිසභාජානියං යථා,
තිධා පභින්නමාතඞ්ගං කුඤ්ජරං’ව මහෙසිනං.

1618. ඔභාසන්තං දිසා සබ්බා උළුරාජං’ව පූරිතං,
රථියං පටිපජ්ජන්තං ලොකජෙට්ඨං අපස්සිසං.

1619. ඤාණෙ චිත්තං පසාදෙත්වා පග්ගහෙත්වාන අඤ්ජලිං,
පසන්නචිත්තො සුමනො සිද්ධත්ථං අභිවාදයිං.

1620. චතුනවුතෙ ඉතො කප්පෙ යං කම්මමකරිං තදා,
දුග්ගතිං නාභිජානාමි ඤාණසඤ්ඤායිදං ඵලං.

1621. තෙසත්තතිම්හි’තො කප්පෙ සොළසා’සුං නරුත්තමා,
සත්තරතනසම්පන්නා චක්කවත්තී මහබ්බලා.

1622. පටිසම්භිදා -පෙ- කතං බුද්ධස්ස සාසනං.

1623. තිවරායං නිවාසී’හං අහොසිං මාලිකො තදා,
අද්දසං විරජං බුද්ධං සිද්ධත්ථං ලොකනායකං.

1624. පසන්නචිත්තො සුමනො පුප්ඵහත්ථමදාසහං,
යත්ථ යත්ථුපපජ්ජාමි තස්ස කම්මස්ස වාහසා.

1625. අනුභොමි ඵලං ඉට්ඨං පුබ්බෙ සුකතමත්තනො,
පරික්ඛිත්තො සුමල්ලෙහි පුප්ඵදානස්සිදං ඵලං.

1626. චතුනවුතෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි බුද්ධපූජායිදං ඵලං.

1627. චතුනවුතුපාදාය ඨපෙත්වා වත්තමානකං,
පඤ්චරාජසතා තත්ථ නජ්ජූපම සනාමකා.

1628. පටිසම්භිදා -පෙ- කතං බුද්ධස්ස සාසනං.