653. ආරාමද්වාරා නික්ඛම්ම පදුමුත්තරො මහාමුනි,
වස්සෙන්තො අමතං වුට්ඨිං නිබ්බාපෙසි මහාජනං.

654. සතසහස්සා තෙ වීරා ඡළභිඤ්ඤා මහිද්ධිකා,
පරිවාරෙන්ති සම්බුද්ධං ඡායාව අනපායිනී.

655. හත්ථික්ඛන්ධගතො ආසිං සෙතච්ඡත්තං වරුත්තමං,
සුචාරුරූපං දිස්වාන විත්ති මෙ උපපජ්ජථ.

656. ඔරුය්හ හත්ථික්ඛන්ධම්හා උපගච්ඡිං නරාසභං,
රතනාමයඡත්තං මෙ බුද්ධසෙට්ඨස්ස ධාරයිං.

657. මම සඞ්කප්පමඤ්ඤාය පදුමුත්තරො මහාඉසි,
තං කථං ඨපයිත්වාන ඉමා ගාථා අභාසථ:

658. “යො සො ඡත්තං අධාරෙසි සොණ්ණාලඞ්කාරභූසිතං,
තමහං කිත්තයිස්සාමි සුණාථ මම භාසතො.

659. ඉතො ගන්ත්වා අයං පොසො තුසිතං ආවසිස්සති,
අනුභොස්සති සම්පත්තිං අච්ඡරාහි පුරක්ඛතො.

660. චතුත්තිංසතික්ඛත්තුඤ්ච දෙවරජ්ජං කරිස්සති,
බලාධිපො අට්ඨසතං වසුධං ආවසිස්සති.

661. අට්ඨපඤ්ඤාසක්ඛත්තුඤ්ච චක්කවත්තී භවිස්සති,
පදෙසරජ්ජං විපුලං මහියා කාරයිස්සති.

662. කප්පසතසහස්සම්හි ඔක්කාකකුලසම්භවො,
ගොතමො නාම ගොත්තෙන සත්ථා ලෙකෙ භවිස්සති.

663. සක්යානං කුලකෙතුස්ස ඤාතිබන්ධු භවිස්සති,
ආනන්දො නාම නාමෙන උපට්ඨාකො මහෙසිනො.

664. ආතාපී නිපකො චාපි බාහුසච්චෙසු කොවිදො,
නිවාතවුත්තී අත්ථද්ධො සබ්බපාඨි භවිස්සති.

665. පධානපහිතත්තො සො උපසන්තො නිරූපධි,
සබ්බාසවෙ පරිඤ්ඤාය නිබ්බායිස්සත’නාසවො”.

666. සන්ති ආරඤ්ඤකා නාගා කුඤ්ජරා සට්ඨිහායනා,
තිධා පභින්නමාතඞ්ගා ඊසාදන්තා උරූළ්හවා.

667. අනෙකසතසහස්සා පණ්ඩිතාපි මහිද්ධිකා,
සබ්බෙ තෙ බුද්ධනාගස්ස න හොන්තු’පනිධිම්හි තෙ.

668. ආදියාමෙ නමස්සාමි මජ්ඣිමෙ අථ පච්ඡිමෙ,
පසන්නචිත්තො සුමනො බුද්ධසෙට්ඨං උපට්ඨහිං.

669. ආතාපී නිපකො චාපි සම්පජානො පතිස්සතො,
සොතාපත්තිඵලම්පත්තො සෙක්ඛභූමීසු කොවිදො.

670. කප්පෙ’තො සතසහස්සෙ යං කම්මමභිනීහරිං,
තා’හං භූමිමනුප්පත්තො ඨිතො සද්ධම්මමාචලො.

බුද්ධො පච්චෙකබුද්ධො ච සාරිපුත්තො ච කොලිතො,
කස්සපො අනුරුද්ධො ච පුණ්ණත්ථෙරො උපාලි ච.
අඤ්ඤාසිකොණ්ඩඤ්ඤා පිණ්ඩොලො රෙවතා’නන්දපණ්ඩිතො.
ඡසතානි ච පඤ්ඤාස ගාථායො සබ්බපිණ්ඩිතා.