1. ලොකනායක වූ යම් සර්‍වඥවරයෙක් කප් කෙළ ගණනිදු පමණ නොකට හැකි කලක් මුළුල්ලෙහි අතිශය දුෂ්කර ක්‍රියාවන් කරනුයේ, සත්ත්‍ව ලෝකයට හිත පිණිස, කායික පරිශ්‍රමයට පැමිණියේද, මහාකාරුණික වූ ඒ ලොකනායක වූ සර්‍වඥයන් වහන්සේට මාගේ නමස්කාරය වේවා.

2 බුදුරජුන් විසින් නිති සෙවුනාලද යම් සපර්‍ය්‍යාපතික නවලොකොත්තර ධර්‍මයක් අවබෝධ නොකිරීම හේතුකොට, සත්ත්‍ව ලෝකය කුදු මහත්වූ භවයෙන් භවයට යේද, අවිද්‍යාදි ක්ලෙශ සමූහය නසනසුලුවූ ඒ උතුම් ධර්‍මයට මාගේ නමස්කාරය වේවා.

3. ශීලසමාධිප්‍රඥාවිමුක්තිවිමුක්තිඥානාදි ගුණයන්ගෙන් යම් ආර්‍ය්‍ය සමූහයක් යුක්තවූයේද, පින් කැමති ජනයන් හට කෙතක් වැනිවූ ඒ ආර්‍ය්‍ය සඞ්ඝයා මස්තකයෙන් වඳිමි.

4 මෙසේ අත්‍යන්තයෙන් නමස්කාර කටයුතු වූ රත්නත්‍රය නමස්කාර කරන්නා වූ මම, යම් මහත් පුණ්‍ය රාශියක් ලැබූයෙම්ද, ඒ පුණ්‍ය රාශියෙහි ආනුභාවයෙන් නැසූ අනතුරු ඇතියෙම්

5 කාමසුඛල්ලිකඅත්තකිලමථානුයොග සඞ්ඛ්‍යාත වූ උභයාන්තයෙහි නොසිටියා වූ මැදුම් පිළිවෙතෙහි මැනවින් පිහිටාගත් බුදුරජාණන් වහන්සේගේ අධිශීල අධිචිත්ත අධිප්‍රඥා සඞ්ඛ්‍යාත ශික්‍ෂාත්‍රයෙහි ඇතුළත් වූ ශාසනය, යම් විනය පිටකයක් පෙළ අරුත් විසින් ලජ්ජීන් කෙරෙහි පැවතීම් අරුතින් පිහිටා සිටියේද, ඒ විනය පිටකය නිකායාන්තර ලබ්ධීන් හා මිශ්‍ර නොකොට පොරණැදුරන් විසින් වර්‍ණනා කරනලද අර්‍ත්‍ථකථාව ඇසුරුකොට වර්‍ණනා කරන්නෙමි.

6-7. එකාන්තයෙන් මේ විනය මාර්‍ගඥාන ජලයෙන් දෝනාලද රාගාදි මල හා කාමාදි ආස්‍රව ඇති, පිරිසිදු වූ ත්‍රිවිද්‍යා හා ප්‍රතිසම්භිදා ඇති, සද්ධර්‍මසංවර්‍ණනාවෙහි දක්‍ෂ වූ සැහැල්ලු පැවැත්මෙහි සුලභ උපමා නැත්තා වූ මහාවිහාරයට ධ්වජ වැනි වූ උතුම් වූ සම්බුදුරජුන් හට අනුව ගියාවූ පොරණැදුරන් විසින් විසිතුරු වූ නයින් මනාකොට වර්‍ණනා කරන ලද්දේය.

8 යම් හෙයකින්, මේ සංවර්‍ණනා හෙළදිව් වැසියන්ගේ බසින් කළබැවින්, අන් දිවයින්වැසි භික්‍ෂු සමූහයාට කිසි ප්‍රයෝජනයක් සිදුනොකෙරේද,

9 එහෙයින්, මේ සංවර්‍ණනාව පාලිනයට අනුරූප කොට, බුද්ධසිරි නම් වූ මහාතෙරුන්ගේ ආරාධනය මනාකොට මෙනෙහි කරමින්, දැන් ආරම්භ කරන්නෙමි.

10. ඒ සංවර්‍ණනාවද මනාකොට ආරම්භ කරන්නා වූ මම, මහ අටුවාව ඒ සංවර්‍ණනාවෙහි ශරීරයකොට, මහාපච්චරි නම් අටුවාවෙහිද, කුරුන්‍දි ආදි නම් ඇති ප්‍රසිද්ධ වූ