අන්තවා ලොකොති එකතො වඩ්ඪිතනිමිත්තං ලොකොති ගාහෙන වා තක්කෙන වා උප්පන්නදිට්ඨි. අනන්තවාති සබ්බතො වඩ්ඪිතං අප්පමාණනිමිත්තං ලොකොති ගාහෙන වා තක්කෙන වා උප්පන්නදිට්ඨි. තං ජීවං තං සරීරන්ති ජීවඤ්ච සරීරඤ්ච එකමෙවාති උප්පන්නදිට්ඨි. සෙසං සබ්බත්ථ උත්තානමෙවාති. ඉමානි තාව සොතාපත්තිමග්ගවසෙන අට්ඨාරස වෙය්යාකරණානි එකං ගමනං.

දුතියං ගමනං දුක්ඛවසෙන වුත්තං. තත්රාපි අට්ඨාරසෙව වෙය්යාකරණානි, තතො පරානි “රූපී අත්තා හොතී”තිආදීනි අට්ඨ වෙය්යාකරණානි, තෙහි සද්ධිං තං දුතියපෙය්යාලොති වුත්තො.

තත්ථ රූපීති ආරම්මණමෙව “අත්තා”ති ගහිතදිට්ඨි. අරූපීති ඣානං “අත්තා”ති ගහිතදිට්ඨි. රූපී ච අරූපී චාති ආරම්මණඤ්ච ඣානඤ්ච “අත්තා”ති ගහිතදිට්ඨි. නෙව රූපී නාරූපීති තක්කමත්තෙන ගහිතදිට්ඨි. එකන්තසුඛීති ලාභීතක්කීජාතිස්සරානං උප්පන්නදිට්ඨි. ඣානලාභිනොපි හි අතීතෙ එකන්තසුඛං අත්තභාවං මනසිකරොතො එවං දිට්ඨි උප්පජ්ජති. තක්කිනොපි “යථා එතරහි අහං එකන්තසුඛී, එවං සම්පරායෙපි භවිස්සාමී”ති උප්පජ්ජති. ජාතිස්සරස්සපි සත්තට්ඨභවෙ සුඛිතභාවං පස්සන්තස්ස එවං උප්පජ්ජති, එකන්තදුක්ඛීතිආදීසුපි එසෙව නයො.

තතියපෙය්යාලො අනිච්චදුක්ඛවසෙන තෙහියෙව ඡබ්බීසතියා සුත්තෙහි වුත්තො, චතුත්ථපෙය්යාලො තිපරිවට්ටවසෙනාති.