යොධ පුඤ්ඤඤ්චාති ඉමං ධම්මදෙසනං සත්ථා පුබ්බාරාමෙ විහරන්තො රෙවතත්ථෙරං ආරබ්භ කථෙසි.

වත්ථු “ගාමෙ වා යදි වාරඤ්ඤෙ”ති (ධ· ප· 98) ගාථාවණ්ණනාය විත්ථාරිතමෙව. වුත්තඤ්හි තත්ථ (ධ· ප· අට්ඨ· 1.98) –

පුන එකදිවසං භික්ඛූ කථං සමුට්ඨාපෙසුං “අහො සාමණෙරස්ස ලාභො, අහො පුඤ්ඤං, යෙන එකකෙන පඤ්චන්නං භික්ඛුසතානං පඤ්චකූටාගාරසතානි කතානී”ති. සත්ථා ආගන්ත්වා “කාය නුත්ථ, භික්ඛවෙ, එතරහි කථාය සන්නිසින්නා”ති පුච්ඡිත්වා “ඉමාය නාමා”ති වුත්තෙ, “භික්ඛවෙ, මය්හං පුත්තස්ස නෙව පුඤ්ඤං අත්ථි, න පාපං, උභයමස්ස පහීන”න්ති වත්වා ඉමං ගාථමාහ –

තත්ථ උභොති ද්වෙපි පුඤ්ඤානි ච පාපානි ච ඡඩ්ඩෙත්වාති අත්ථො. සඞ්ගන්ති රාගාදිභෙදං සඞ්ගං. උපච්චගාති අතික්කන්තො. වට්ටමූලකසොකාභාවෙන අසොකං අබ්භන්තරෙ රාගරජාදීනං අභාවෙන විරජං නිරුපක්කිලෙසතාය සුද්ධං තමහං බ්රාහ්මණං වදාමීති අත්ථො.

දෙසනාවසානෙ බහූ සොතාපත්තිඵලාදීනි පාපුණිංසූති.

චන්දං වාති ඉමං ධම්මදෙසනං සත්ථා ජෙතවනෙ විහරන්තො චන්දාභත්ථෙරං ආරබ්භ කථෙසි.

තත්රායං අනුපුබ්බී කථා – අතීතෙ එකො බාරාණසිවාසී වාණිජො “පච්චන්තං ගන්ත්වා චන්දනං ආහරිස්සාමී”ති බහූනි වත්ථාභරණාදීනි ගහෙත්වා පඤ්චහි සකටසතෙහි පච්චන්තං ගන්ත්වා ගාමද්වාරෙ නිවාසං ගහෙත්වා අටවියං ගොපාලදාරකෙ පුච්ඡි – “ඉමස්මිං ගාමෙ පබ්බතපාදකම්මිකො කොචි මනුස්සො අත්ථී”ති? “ආම, අත්ථී”ති. “කො නාමෙසො”ති? “අසුකො නාමා”ති. “භරියාය පනස්ස පුත්තානං වා කිංනාම”න්ති? “ඉදඤ්චිදඤ්චා”ති. “කහං පනස්ස ඨානෙ ගෙහ”න්ති? “අසුකට්ඨානෙ නාමා”ති. සො තෙහි දින්නසඤ්ඤාය සුඛයානකෙ නිසීදිත්වා තස්ස ගෙහද්වාරං ගන්ත්වා යානා ඔරුය්හ ගෙහං පවිසිත්වා “අසුකනාමෙ”ති තං ඉත්ථිං පක්කොසි. සා “එකො නො ඤාතකො භවිස්සතී”ති වෙගෙනාගන්ත්වා ආසනං පඤ්ඤාපෙසි. සො තත්ථ නිසීදිත්වා නාමං වත්වා “මම සහායො කහ”න්ති පුච්ඡි. “අරඤ්ඤං ගතො, සාමී”ති. “මම පුත්තො අසුකො නාම, මම ධීතා අසුකා නාම කහ”න්ති සබ්බෙසං නාමං කිත්තෙන්තොව පුච්ඡිත්වා “ඉමානි නෙසං වත්ථාභරණානි දදෙය්යාසි, සහායස්සාපි මෙ අටවිතො ආගතකාලෙ ඉදං වත්ථාභරණං දදෙය්යාසී”ති අදාසි. සා තස්ස උළාරං සක්කාරං කත්වා සාමිකස්ස ආගතකාලෙ “සාමි, ඉමිනා ආගතකාලතො පට්ඨාය සබ්බෙසං නාමං වත්වා ඉදඤ්චිදඤ්ච දින්න”න්ති ආහ. සොපිස්ස කත්තබ්බයුත්තකං කරි.