67. යං චිත්තං උප්පජ්ජති තං චිත්තං න නිරුජ්ඣතීති: ආමන්තා.

යං වා පන චිත්තං න නිරුජ්ඣති තං චිත්තං උප්පජ්ජතීති, අතීතානාගතං චිත්තං න නිරුජ්ඣති, නො ච තං චිත්තං උප්පජ්ජති: උප්පාදක්ඛණෙ චිත්තං න නිරුජ්ඣති චෙව උප්පජ්ජති ච.

68. යං චිත්තං න උප්පජ්ජති තං චිත්තං නිරුජ්ඣතීති: අතීතානාගතං චිත්තං න උප්පජ්ජති, නො ච තං චිත්තං නිරුජ්ඣති, භඞ්ගක්ඛණෙ චිත්තං න උප්පජ්ජති චෙව නිරුජ්ඣති ච.

යං වා පන චිත්තං නිරුජ්ඣති තං චිත්තං න උප්පජ්ජතීති: ආමන්තා.

69. යං චිත්තං උප්පජ්ජමානං තං චිත්තං උප්පන්නන්ති: ආමන්තා.

යං වා පන චිත්තං උප්පන්නං තං චිත්තං උප්පජ්ජමානන්ති භඞ්ගක්ඛණෙ චිත්තං උප්පන්නං, නො ච තං චිත්තං උප්පජ්ජමානං, උප්පාදක්ඛණෙ චිත්තං උප්පන්නං චෙව උප්පජ්ජමානඤ්ච.

70. යං චිත්තං න උප්පජ්ජමානං තං චිත්තං න උප්පන්නන්ති: භඞ්ගක්ඛණෙ චිත්තං න උප්පජ්ජමානං, නො ච තං චිත්තං න උප්පන්නං, අතීතානාගතං චිත්තං න චෙව උප්පජ්ජමානං න ච උප්පන්නං.

යං වා පන චිත්තං න උප්පන්නං තං චිත්තං න උප්පජ්ජමානන්ති: ආමන්තා.

71. යං චිත්තං නිරුජ්ඣමානං තං චිත්තං උප්පන්නන්ති: ආමන්තා.

යං වා පන චිත්තං උප්පන්නං තං චිත්තං නිරුජ්ඣමානන්ති: උප්පාදක්ඛණෙ චිත්තං උප්පන්නං, නො ච තං චිත්තං නිරුජ්ඣමානං, භඞ්ගක්ඛණෙ චිත්තං උප්පන්නඤ්චෙව නිරුජ්ඣමානඤ්ච.

72. යං චිත්තං න නිරුජ්ඣමානං තං චිත්තං න උප්පන්නන්ති: උප්පාදක්ඛණෙ චිත්තං න නිරුජ්ඣමානං, නො ච තං චිත්තං න උප්පන්නං, අතීතානාගතං චිත්තං න චෙව නිරුජ්ඣමානං න ච උප්පන්නං.

යං වා පන චිත්තං න උප්පන්නං තං චිත්තං න නිරුජ්ඣමානන්ති: ආමන්තා.

73. යං චිත්තං උප්පන්නං තං චිත්තං උප්පජ්ජිත්ථාති: නො.

යං වා පන චිත්තං උප්පජ්ජිත්ථ තං චිත්තං උප්පන්නන්ති: නො.

74. යං චිත්තං න උප්පන්නං තං චිත්තං න උප්පජ්ජිත්ථාති: අතීතං චිත්තං න උප්පන්නං, නො ච තං චිත්තං න උප්පජ්ජිත්ථ, අනාගතං චිත්තං න චෙව උප්පන්නං, න ච උප්පජ්ජිත්ථ.

යං වා පන චිත්තං න උප්පජ්ජිත්ථ තං චිත්තං න උප්පන්නන්ති: පච්චුප්පන්නං චිත්තං න උප්පජ්ජිත්ථ, නො ච තං චිත්තං න උප්පන්නං අනාගතං චිත්තං න චෙව උප්පජ්ජිත්ථ, න ච උප්පන්නං.

75. යං චිත්තං උප්පන්නං තං චිත්තං උප්පජ්ජිස්සතීති: නො.

යං වා පන චිත්තං උප්පජ්ජිස්සති තං චිත්තං උප්පන්නන්ති: නො.

76. යං චිත්තං න උප්පන්නං තං චිත්තං න උප්පජ්ජිස්සතීති: අනාගතං චිත්තං න උප්පන්නං, නො ච තං චිත්තං න උප්පජ්ජිස්සති, අතීතං චිත්තං න චෙව උප්පන්නං, න ච උප්පජ්ජිස්සති.

යං වා පන චිත්තං න උප්පජ්ජිස්සති තං චිත්තං න උප්පන්නන්ති: පච්චුප්පන්නං චිත්තං න උප්පජ්ජිස්සති, නො ච තං චිත්තං න උප්පන්නං අතීතං චිත්තං න චෙව උප්පජ්ජිස්සති, න ච උප්පන්නං.