2. පඤ්ඤත්ති නිද්දෙසවාර
1. චක්ඛු චක්ඛුධාතූති: දිබ්බචක්ඛු පඤ්ඤාචක්ඛු චක්ඛු, න චක්ඛුධාතු. චක්ඛුධාතු චක්ඛු චෙව චක්ඛුධාතු ච, චක්ඛුධාතු චක්ඛූති: ආමන්තා.
සොතං සොතධාතූති: දිබ්බසොතං තණ්හාසොතං සොතං, න සොතධාතු. සොතධාතු සොතඤ්චෙව සොතධාතු ච, සොතධාතු සොතන්ති: ආමන්තා.
ඝානං ඝානධාතූති: ආමන්තා. ඝානධාතු ඝානන්ති: ආමන්තා.
(ජිව්හාපි ඝානධාතුසදිසා)
කායො කායධාතූති: කායධාතුං ඨපෙත්වා අවසෙසො කායො කායො, න කායධාතු. කායධාතු කායො චෙව කායධාතු ච. කායධාතු කායොති: ආමන්තා.
රූපං රූපධාතූති: රූපධාතුං ඨපෙත්වා අවසෙසං රූපං රූපං න රූපධාතු. රූපධාතු රූපඤ්චෙව රූපධාතු ච. රූපධාතු රූපන්ති: ආමන්තා.
(සද්දො ඝානසදිසො)
ගන්ධො ගන්ධධාතූති: සීලගන්ධො සමාධිගන්ධො පඤ්ඤාගන්ධො ගන්ධො, න ගන්ධධාතු. ගන්ධධාතු ගන්ධො චෙව ගන්ධධාතු ච. ගන්ධධාතු ගන්ධොති: ආමන්තා.
රසො රසධාතූති: අත්ථරසො ධම්මරසො විමුත්තිරසො රසො. න රසධාතු. රසධාතු රසො චෙව රසධාතු ච. රසධාතු රසොති: ආමන්තා.
(ඵොට්ඨබ්බො ඝානසදිසො)
චක්ඛුවිඤ්ඤාණං චක්ඛුවිඤ්ඤාණධාතූති: ආමන්තා. චක්ඛුවිඤ්ඤාණධාතු චක්ඛුවිඤ්ඤාණන්ති: ආමන්තා. සොතවිඤ්ඤාණං -පෙ- ඝානවිඤ්ඤාණං -පෙ- ජිව්හාවිඤ්ඤාණං -පෙ- කායවිඤ්ඤාණං -පෙ-
මනො මනොධාතූති: මනොධාතු ඨපෙත්වා අවසෙසො මනො මනො, න මනොධාතු. මනොධාතු මනො චෙව මනොධාතු ච. මනොධාකු මනොති: ආමන්තා.
මනොවිඤ්ඤාණං මනොවිඤ්ඤාණධාතූති: ආමන්තා. මනො විඤ්ඤාණධාතු මනොවිඤ්ඤාණන්ති: ආමන්තා.
ධම්මො ධම්මධාතූති: ධම්මධාතුං ඨපෙත්වා අවසෙසො ධම්මො ධම්මො, න ධම්මධාතු. ධම්මධාතු ධම්මො චෙව ධම්මධාතු ච. ධම්මධාතු ධම්මොති: ආමන්තා. (අනුලොමං)
2. න චක්ඛු න චක්ඛුධාතූති: ආමන්තා. න චක්ඛුධාතු න චක්ඛූ ති: දිබ්බචක්ඛු පඤ්ඤාචක්ඛු න චක්ඛුධාතු, චක්ඛු. චක්ඛුඤ්ච චක්ඛුධාතුඤ්ච ඨපෙත්වා අවසෙසං න චෙව චක්ඛු න ච චක්ඛුධාතු.
න සොතං න සොතධාතූති: ආමන්තා. න සොතධාතු න සොතන්ති: දිබ්බසොතං තණ්හාසොතං න සොතධාතු, සොතං. සොතඤ්ච සොතධාතුඤ්ච ඨපෙත්වා අවසෙසං න චෙව සොතං න ච සොතධාතු.
න ඝානං න ඝානධාතූති: ආමන්තා. න ඝානධාතු න ඝානන්ති: ආමන්තා. න ජිව්හා -පෙ-
(සඞ්ඛිත්තං. උභතො ආමන්තා.)
න කායො න කායධාතූති: ආමන්තා. න කායධාතු න කායොති: කායධාතු ඨපෙත්වා අවසෙසො කායො න කායධාතු, කායො. කායඤ්ච කායධාතුඤ්ච ඨපෙත්වා අවසෙසො න චෙව කායො න ච කායධාතු.
න රූපං න රූපධාතූති: ආමන්තා. න රූපධාතු න රූපන්ති: රූපධාතුං ඨපෙත්වා අවසෙසං රූපං න රූපධාතු, රූපං. රූපඤ්ච රූපධාතුඤ්ච ඨපෙත්වා අවසෙසං න චෙව රූපං න ච රූපධාතු.
න සද්දො -පෙ- න ගන්ධො න ගන්ධධාතූති: ආමන්තා. න ගන්ධධාතු න ගන්ධොති: සීලගන්ධො සමාධිගන්ධො පඤ්ඤාගන්ධො න ගන්ධධාතු, ගන්ධො. ගන්ධඤ්ච ගන්ධධාතුඤ්ච ඨපෙත්වා අවසෙසො න චෙව ගන්ධො න ච ගන්ධධාතු.
න රසො න රසධාතූති: ආමන්තා. න රසධාතු න රසොති: අත්ථරසො ධම්මරසො විමුත්තිරසො න රසධාතු, රසො. රසඤ්ච රසධාතුඤ්ච ඨපෙත්වා අවසෙසො න චෙව රසො න ච රසධාතු.