2. පඤ්ඤත්ති නිද්දෙසවාරො
1. චක්ඛු චක්ඛායතනන්ති: දිබ්බචක්ඛු පඤ්ඤාචක්ඛු චක්ඛු, න චක්ඛායතනං, චක්ඛායතනං චක්ඛු චෙව චක්ඛායතනඤ්ච. චක්ඛායතනං චක්ඛූති: ආමන්තා.
සොතං සොතායතනන්ති: දිබ්බසොතං තණ්හාසොතං සොතං, න සොතායතනං, සොතායතනං සොතඤ්චෙව සොතායතනඤ්ච. සොතායතනං සොතන්ති: ආමන්තා.
ඝානං ඝානායතනන්ති: ආමන්තා. ඝානායතනං ඝානන්ති: ආමන්තා.
ජිව්හා ජිව්හායතනන්ති: ආමන්තා. ජිව්හායතනං ජිව්හාති: ආමන්තා.
කායො කායායතනන්ති: කායායතනං ඨපෙත්වා අවසෙසො කායො කායො, න කායායතනං, කායායතනං කායො චෙව කායායතනඤ්ච, කායායතනං කායොති: ආමන්තා.
රූපං රූපායතනන්ති: රූපායතනං ඨපෙත්වා අවසෙසං රූපං රූපං, න රූපායතනං, රූපායතනං රූපඤ්චෙව රූපායතනඤ්ච, රූපායතනං රූපන්ති: ආමන්තා.
සද්දො සද්දායතනන්ති: ආමන්තා. සද්දායතනං සද්දොති: ආමන්තා.
ගන්ධො ගන්ධායතනන්ති: සීලගන්ධො සමාධිගන්ධො පඤ්ඤාගන්ධො ගන්ධො. න ගන්ධායතනං. ගන්ධායතනං ගන්ධො චෙව ගන්ධායතනඤ්ච. ගන්ධායතනං ගන්ධොති: ආමන්තා.
රසො රසායතනන්ති: අත්ථරසො ධම්මරසො විමුත්තිරසො රසො, න රසායතනං, රසායතනං රසො චෙව රසායතනඤ්ච. රසායතනං රසොති: ආමන්තා.
ඵොට්ඨබ්බො ඵොට්ඨබ්බායතනන්ති: ආමන්තා. ඵොට්ඨබ්බායතනං ඵොට්ඨබ්බොති: ආමන්තා.
මනො මනායතනන්ති: ආමන්තා. මනායතනං මනොති: ආමන්තා.
ධම්මො ධම්මායතනන්ති: ධම්මායතනං ඨපෙත්වා අවසෙසො ධම්මො ධම්මො, න ධම්මායතනං. ධම්මායතනං ධම්මො චෙව ධම්මායතනඤ්ච, ධම්මායතනං ධම්මොති: ආමන්තා. (අනුලොම)
2. න චක්ඛු න චක්ඛායතනන්ති: ආමන්තා. න චක්ඛායතනං න චක්ඛූති: දිබ්බචක්ඛු පඤ්ඤාචක්ඛු න චක්ඛායතනං, චක්ඛු. චක්ඛුඤ්ච චක්ඛායතනඤ්ච ඨපෙත්වා අවසෙසං න චෙව චක්ඛු න ච චක්ඛායතනං.
න සොතං න සොතායතනන්ති: ආමන්තා. න සොතායතනං න සොතන්ති: දිබ්බසොතං තණ්හාසොතං න සොතායතනං සොතං. සොතඤ්ච සොතායතනඤ්ච ඨපෙත්වා අවසෙසං න චෙව සොතං න ච සොතායතනං.
න ඝානං න ඝානායතනන්ති: ආමන්තා. න ඝානායතනං න ඝානන්ති: ආමන්තා.
න ජිව්හා න ජිව්හායතනන්ති: ආමන්තා. න ජිව්හායතනං න ජිව්හාති: ආමන්තා.
න කායො න කායායතනන්ති: ආමන්තා. න කායායතනං න කායොති: කායායතනං ඨපෙත්වා අවසෙසො කායො න කායායතනං, කායො. කායඤ්ච කායායතනඤ්ච ඨපෙත්වා අවසෙසං න චෙව කායො න ච කායායතනං.
න රූපං න රූපායතනන්ති: ආමන්තා. න රූපායතනං න රූපන්ති: රූපායතනං ඨපෙත්වා අවසෙසං න රූපායතනං, රූපං. රූපඤ්ච රූපායතනඤ්ච ඨපෙත්වා අවසෙසං න චෙව රූපං න ච රූපායතනං.
න සද්දො න සද්දායතනන්ති: ආමන්තා. න සද්දායතනං න සද්දොති: ආමන්තා.
න ගන්ධො න ගන්ධායතනන්ති: ආමන්තා. න ගන්ධායතනං න ගන්ධොති: සීලගන්ධො සමාධිගන්ධො පඤ්ඤාගන්ධො න ගන්ධායතනං, ගන්ධො. ගන්ධඤ්ච ගන්ධායතනඤ්ච ඨපෙත්වා අවසෙසං න චෙව ගන්ධො න ච ගන්ධායතනං.
න රසො න රසායතනන්ති: ආමන්තා. න රසායතනං න රසොති: අත්ථරසො ධම්මරසො විමුත්තිරසො න රසායතනං, රසො. රසඤ්ච රසායතනඤ්ච ඨපෙත්වා අවසෙසං න චෙව රසො න ච රසායතනං.
න ඵොට්ඨබ්බො න ඵොට්ඨබ්බායතනන්ති: ආමන්තා. න ඵොට්ඨබ්බායතනං න ඵොට්ඨබ්බොති: ආමන්තා.