1074. දෙවාති තයො දෙවා: සම්මුති දෙවා, උප්පත්ති දෙවා, විසුද්ධි දෙවා. සම්මුතිදෙවා නාම රාජානො, දෙවියො, කුමාරා. උප්පත්තිදෙවා නාම චාතුම්මහාරාජිකෙ දෙවෙ උපාදාය තදුපරි දෙවා. විසුද්ධිදෙවා නාම අරහන්තො වුච්චන්ති.
1075. දානං දත්වා සීලං සමාදියිත්වා උපොසථකම්මං කත්වා කත්ථ උප්පජ්ජන්ති.
දානං දත්වා සීලං සමාදියිත්වා උපොසථකම්මං කත්වා අප්පෙකච්චෙ ගහපතිමහාසාළානං සහව්යතං උපපජ්ජන්ති, අප්පෙකච්චෙ බ්රාහ්මණමහාසාළානං සහව්යතං උපපජ්ජන්ති, අප්පෙකච්චෙ ඛත්තියමහාසළානං සහව්යතං උපපජ්ජන්ති, අප්පෙකච්චෙ චාතුම්මහාරාජිකානං දෙවානං සහව්යතං උපපජ්ජන්ති, අප්පෙකච්චෙ තාවතිංසානං දෙවානං සහව්යතං උපපජ්ජන්ති. අප්පෙකච්චෙ යාමානං දෙවානං සහව්යතං උපපජ්ජන්ති, අප්පෙකච්චෙ තුසිතානං දෙවානං සහව්යතං උපපජ්ජන්ති, අප්පෙකච්චෙ නිම්මාණරතීනං දෙවානං සහව්යතං උපපජ්ජන්ති, අප්පෙකච්චෙ පරනිම්මිත වසවත්තීනං දෙවානං සහව්යතං උපපජ්ජන්ති.
1076. මනුස්සානං කිත්තකං ආයුප්පමාණං: වස්සසතං අප්පං වා භිය්යො.
1077. චාතුම්මහාරාජිකානං දෙවානං කිත්තකං ආයුප්පමාණං: යානි මානුස්සකානි පඤ්ඤාසවස්සානි චාතුම්මහාරාජිකානං දෙවානං එසො එකො රත්තින්දිවො. තාය රත්තියා තිංස රත්තියො මාසො. තෙන මාසෙන ද්වාදසමාසියො සංවච්ඡරො. තෙන සංවච්ඡරෙන දිබ්බානි පඤ්ච වස්සසතානි චාතුම්මහාරාජිකානං දෙවානං ආයුප්පමාණං. මනුස්සානං ගණනාය කිත්තකං හොති: නවුතිවස්සසතසහස්සානි.
1078. තාවතිංසානං දෙවානං කිත්තකං ආයුප්පමාණං: යං මානුස්සකං වස්සසතං, තාවතිංසානං දෙවානං එසො එකො රත්තින්දිවො. තාය රත්තියා තිංස රත්තියො මාසො, තෙන මාසෙන ද්වාදසමාසියො සංවච්ඡරො, තෙන සංවච්ඡරෙන දිබ්බං වස්සසහස්සං තාවතිංසානං දෙවානං ආයුප්පමාණං. මනුස්සානං ගණනාය කිත්තකං හොති: තිස්සො ච වස්සකොටියො සට්ඨි ච වස්සසතසහස්සානි.
1079. යාමානං දෙවානං කිත්තකං ආයුප්පමාණං: යානි මානුස්සකානි ද්වෙ වස්සසතානි, යාමානං දෙවානං එසො එකො රත්තින්දිවො. තාය රත්තියා තිංසරත්තියො මාසො තෙන මාසෙන ද්වාදසමාසියො සංවච්ඡරො. තෙ සංවච්ඡරෙන දිබ්බානි ද්වෙ වස්සසහස්සානි යාමානං දෙවානං ආයුප්පමාණං. මනුස්සානං ගණනාය කිත්තකං හොති: චුද්දස ච වස්සකොටියො චත්තාරීසඤ්ච වස්සසතසහස්සානි.
1080. තුසිතානං දෙවානං කිත්තකං ආයුප්පමාණං: යානි මානුස්සකානි චත්තාරිවස්සසතානි, තුසිතානං දෙවානං එසො එකො රත්තින්දිවො. තාය රත්තියා තිංසරත්තියො මාසො තෙන මාසෙන ද්වාදසමාසියො සංවච්ඡරො. තෙන සංවච්ඡරෙන දිබ්බානි චත්තාරි වස්සසහස්සානි තුසිතානං දෙවානං ආයුප්පමාණං. මනුස්සානං ගණනාය කිත්තකං හොති: සත්තපඤ්ඤාස වස්සකොටියො සට්ඨි ච වස්සසතසහස්සානි.
1081. නිම්මාණරතීනං දෙවානං කිත්තකං ආයුප්පමාණං: යානි මානුස්සකානි අට්ඨවස්සසතානි, නිම්මාණරතීනං දෙවානං එසො එකො රත්තින්දිවො. තාය රත්තියා තිංස රත්තියො මාසො. තෙන මාසෙන ද්වාදසමාසියො සංවච්ඡරො, තෙන සංවච්ඡරෙන දිබ්බානි අට්ඨ වස්සසහස්සානි නිම්මාණරතීනං දෙවානං ආයුප්පමාණං. මනුස්සානං ගණනාය කිත්තකං හොති: ද්වෙ වස්සකොටිසතානි තිංසා ච වස්සකොටියො චත්තාරීසඤ්ච වස්සසතසහස්සානි.
1082. පරනිම්මිතවසවත්තීනං දෙවානං කිත්තකං ආයුප්පමාණං: යානි මානුස්සකානි සොළසවස්සසතානි, පරනිම්මිතවසවත්තීනං දෙවානං එසො එකො රත්තින්දිවො. තාය රත්තියා තිංස රත්තියො මාසො, තෙන මාසෙන ද්වාදසමාසියො සංවච්ඡරො, තෙන සංවච්ඡරෙන දිබ්බානි සොළසවස්සසහස්සානි පරනිම්මිතවසවත්තීනං දෙවානං ආයුප්පමාණං. මනුස්සානං ගණනාය කිත්තකං හොති: නව ච වස්සකොටි සතානි එකවීසඤ්ච වස්සකොටියො සට්ඨි ච වස්සසතසහස්සානී’ති.