9. 7.
විතක්කානුපතිතකථා.
1. ස. පු: සබ්බං චිත්තං විතක්කානුපතිතන්ති.
ප. පටිඤ්ඤා: ආමන්තා.
ස. අනු: සබ්බං චිත්තං විචාරානුපතිතං පීතානුපතිතං සුඛානුපතිතං දුක්ඛානුපතිතං සොමනස්සානුපතිතං දොමනස්සානුපතිතං උපෙක්ඛානුපතිතං සද්ධානුපතිතං විරියානුපතිතං සතානුපතිතං සමාධානුපතිතං පඤ්ඤානුපතිතං රාගානුපතිතං දොසානුපතිතං -පෙ- අනොත්තප්පානුපතිතන්ති.
ප. පටි: න හෙවං වත්තබ්බෙ -පෙ-
2. ස. පු: සබ්බං චිත්තං විතක්කානුපතිතන්ති.
ප. පටිඤ්ඤා: ආමන්තා.
ස. අනු: නනු අත්ථී අවිතක්කො විචාරමත්තො සමාධී’ති.
ප. පටිඤ්ඤා: ආමන්තා.
අනු. ඨ: හඤ්චි අත්ථී අවිතක්කො විචාරමත්තො සමාධි,
අනු. පා: නො ච වත රෙ වත්තබ්බෙ: සබ්බං චිත්තං විතක්කානුපතිතන්ති.
3. ස. පු: සබ්බං චිත්තං විතක්කානුපතිතන්ති.
ප. පටිඤ්ඤා: ආමන්තා.
ස. අනු: නනු අත්ථී අවිතක්කො අවිචාරො සමාධී’ති.
ප. පටිඤ්ඤා: ආමන්තා.
අනු. ඨ: හඤ්චි අත්ථී අවිතක්කො අවිචාරො සමාධි,
අනු. පා: නො ච වත රෙ වත්තබ්බෙ: සබ්බං චිත්තං විතක්කානුපතිතන්ති.
4. ස. පු: සබ්බං චිත්තං විතක්කානුපතිතන්ති.
ප. පටිඤ්ඤා: ආමන්තා.
ස. අනු: නනු තයො සමාධී වුත්තා භගවතා: “සවිතක්කො සවිචාරො සමාධි, අවිතක්කො විචාරමත්තො සමාධි, අවිතක්කො අවිචාරො සමාධී”ති.
ප. පටිඤ්ඤා: ආමන්තා.
අනු. ඨ: හඤ්චි තයො සමාධි වුත්තා භගවතා: “සවිතක්කො සවිචාරො සමාධි, අවිතක්කො විචාරමත්තො සමාධි, අවිතක්කො අවිචාරො සමාධී”ති,
අනු. පා: නො ච වත රෙ වත්තබ්බෙ: සබ්බං චිත්තං විතක්කානුපතිතන්ති.
විතක්කානුපතිතකථා නිට්ඨිතා.
9. 8.
විතක්කවිප්ඵාරසද්දකථා.
1. ස. පු: සබ්බසො විතක්කයතො විචාරයතො විතක්කවිප්ඵාරො සද්දො’ති.
ප. පටිඤ්ඤා: ආමන්තා.
ස. අනු: සබ්බසො ඵුසයතො ඵස්සවිප්ඵාරො සද්දො, සබ්බසො වෙදයතො වෙදනාවිප්ඵාරො සද්දො, සබ්බසො සඤ්ජානතො සඤ්ඤාවිප්ඵාරො සද්දො, සබ්බසො චෙතයතො චෙතනාවිප්ඵාරො සද්දො, සබ්බසො චින්තයතො චිත්තවිප්ඵාරො සද්දො, සබ්බසො සරතො සතිවිප්ඵාරො සද්දො, සබ්බසො පජානතො පඤ්ඤාවිප්ඵාරො සද්දො’ති.
ප. පටි: න හෙවං වත්තබ්බෙ -පෙ-
2. ස. පු: සබ්බසො විතක්කයතො විචාරයතො විතක්කවිප්ඵාරො සද්දො’ති.
ප. පටිඤ්ඤා: ආමන්තා.
ස. අනු: විතක්කවිප්ඵාරො සද්දො සොතවිඤ්ඤෙය්යො, සොතස්මිං පටිහඤ්ඤති, සොතස්ස ආපාථං ආගච්ඡතී’ති.
ප. පටි: න හෙවං වත්තබ්බෙ -පෙ-
3. ස. පු: නනු විතක්කවිප්ඵාරො සද්දො න සොතවිඤ්ඤෙය්යො, න සොතස්මිං පටිහඤ්ඤති, න සොතස්ස ආපාථං ආගච්ඡතී’ති.
ප. පටිඤ්ඤා: ආමන්තා.
අනු. ඨ: හඤ්චි විතක්කවිප්ඵාරො සද්දො න සොතවිඤ්ඤෙය්යො, න සොතස්මිං පටිහඤ්ඤති, න සොතස්ස ආපාථං ආගච්ඡති,
අනු. පා: නො ච වත රෙ වත්තබ්බෙ: සබ්බසො විතක්කයතො විචාරයතො විතක්කවිප්ඵාරො සද්දො’ති.
විතක්කවිප්ඵාරසද්දකථා නිට්ඨිතා.