9. 8.
විතක්කවිප්ඵාරසද්දකථා.
1. ස. පු: සබ්බසො විතක්කයතො විචාරයතො විතක්කවිප්ඵාරො සද්දො’ති.
ප. පටිඤ්ඤා: ආමන්තා.
ස. අනු: සබ්බසො ඵුසයතො ඵස්සවිප්ඵාරො සද්දො, සබ්බසො වෙදයතො වෙදනාවිප්ඵාරො සද්දො, සබ්බසො සඤ්ජානතො සඤ්ඤාවිප්ඵාරො සද්දො, සබ්බසො චෙතයතො චෙතනාවිප්ඵාරො සද්දො, සබ්බසො චින්තයතො චිත්තවිප්ඵාරො සද්දො, සබ්බසො සරතො සතිවිප්ඵාරො සද්දො, සබ්බසො පජානතො පඤ්ඤාවිප්ඵාරො සද්දො’ති.
ප. පටි: න හෙවං වත්තබ්බෙ -පෙ-
2. ස. පු: සබ්බසො විතක්කයතො විචාරයතො විතක්කවිප්ඵාරො සද්දො’ති.
ප. පටිඤ්ඤා: ආමන්තා.
ස. අනු: විතක්කවිප්ඵාරො සද්දො සොතවිඤ්ඤෙය්යො, සොතස්මිං පටිහඤ්ඤති, සොතස්ස ආපාථං ආගච්ඡතී’ති.
ප. පටි: න හෙවං වත්තබ්බෙ -පෙ-
3. ස. පු: නනු විතක්කවිප්ඵාරො සද්දො න සොතවිඤ්ඤෙය්යො, න සොතස්මිං පටිහඤ්ඤති, න සොතස්ස ආපාථං ආගච්ඡතී’ති.
ප. පටිඤ්ඤා: ආමන්තා.
අනු. ඨ: හඤ්චි විතක්කවිප්ඵාරො සද්දො න සොතවිඤ්ඤෙය්යො, න සොතස්මිං පටිහඤ්ඤති, න සොතස්ස ආපාථං ආගච්ඡති,
අනු. පා: නො ච වත රෙ වත්තබ්බෙ: සබ්බසො විතක්කයතො විචාරයතො විතක්කවිප්ඵාරො සද්දො’ති.
විතක්කවිප්ඵාරසද්දකථා නිට්ඨිතා.
9. 9.
න යථාචිත්තස්ස වාචාතිකථා.
1. ස. පු: න යථාචිත්තස්ස වාචා’ති.
ප. පටිඤ්ඤා: ආමන්තා.
ස. අනු: අඵස්සකස්ස වාචා, අවෙදනකස්ස වාචා, අසඤ්ඤකස්ස වාචා, අචෙතනකස්ස වාචා, අචිත්තකස්ස වාචා’ති.
ප. පටි: න හෙවං වත්තබ්බෙ -පෙ-
ස. අනු: නනු සඵස්සකස්ස වාචා, සවෙදනකස්ස වාචා, සසඤ්ඤකස්ස වාචා, සචෙතනකස්ස වාචා සචිත්තකස්ස වාචා’ති.
ප. පටිඤ්ඤා: ආමන්තා.
අනු. ඨ: හඤ්චි සඵස්සකස්ස වාචා -පෙ- සචිත්තකස්ස වාචා,
අනු. පා: නො ච වත රෙ වත්තබ්බෙ: න යථාචිත්තස්ස වාචාති.
2. ස. පු: න යථාචිත්තස්ස වාචා’ති.
ප. පටිඤ්ඤා: ආමන්තා.
ස. අනු: අනාවජ්ජන්තස්ස වාචා -පෙ- අනාභොගස්ස වාචා -පෙ- අපණිදහන්තස්ස වාචා’ති.
ප. පටි: න හෙවං වත්තබ්බෙ -පෙ-
ස. අනු: නනු ආවජ්ජන්තස්ස වාචා ආභොගස්ස වාචා -පෙ- පණිදහන්තස්ස වාචා’ති.
ප. පටිඤ්ඤා: ආමන්තා.
අනු. ඨ: හඤ්චි ආවජ්ජන්තස්ස වාචා ආභොගස්ස වාචා -පෙ- පණිදහන්තස්ස වාචා,
අනු. පා: නො ච වත රෙ වත්තබ්බෙ: න යථාචිත්තස්ස වාචා’ති.