7. 2.
සම්පයුත්තකථා.
1. ස. පු: නත්ථී කෙචි ධම්මා කෙහිචි ධම්මෙහි සම්පයුත්තා’ති.
ප. පටිඤ්ඤා: ආමන්තා.
ස. අනු: නනු අත්ථී කෙචි ධම්මා කෙහිචි ධම්මෙහි සහගතා සහජාතා සංසට්ඨා එකුප්පාදා එකනිරොධා එකවත්ථුකා එකාරම්මණා’ති.
ප. පටිඤ්ඤා: ආමන්තා.
අනු. ඨ: හඤ්චි අත්ථී කෙචි ධම්මා කෙහිචි ධම්මෙහි සහගතා සහජාතා සංසට්ඨා එකුප්පාදා එකනිරොධා එකවත්ථුකා එකාරම්මණා,
අනු. පා: නො ච වත රෙ වත්තබ්බෙ: නත්ථී කෙචි ධම්මා කෙහිචි ධම්මෙහි සම්පයුත්තා’ති.
2. ස. පු: වෙදනාක්ඛන්ධො සඤ්ඤාක්ඛන්ධෙන සහජාතො’ති.
ප. පටිඤ්ඤා: ආමන්තා.
අනු. ඨ: හඤ්චි අත්ථී වෙදනාක්ඛන්ධො සඤ්ඤාක්ඛන්ධෙන සහජාතො,
අනු. පා: තෙන වත රෙ වත්තබ්බෙ: වෙදනාක්ඛන්ධො සඤ්ඤාක්ඛන්ධෙන සම්පයුත්තො’ති.
ස. අනු: වෙදනාක්ඛන්ධො සඞ්ඛාරක්ඛන්ධෙන විඤ්ඤාණක්ඛන්ධෙන සහජාතො’ති.
ප. පටිඤ්ඤා: ආමන්තා.
අනු. ඨ: හඤ්චි වෙදනාක්ඛන්ධො විඤ්ඤාණක්ඛන්ධෙන සහජාතො,
අනු. පා: තෙන වත රෙ වත්තබ්බෙ: වෙදනාක්ඛන්ධො විඤ්ඤාණක්ඛන්ධෙන සම්පයුත්තො’ති.
ස. අනු: සඤ්ඤාක්ඛන්ධො සඞ්ඛාරක්ඛන්ධො විඤ්ඤාණක්ඛන්ධො වෙදනාක්ඛන්ධෙන සඤ්ඤාක්ඛන්ධෙන සඞ්ඛාරක්ඛන්ධෙන සහජාතො’ති.
ප. පටිඤ්ඤා: ආමන්තා.
අනු. ඨ: හඤ්චි විඤ්ඤාණක්ඛන්ධො සඞ්ඛාරක්ඛන්ධෙන සහජාතො,
අනු. පා: තෙන වත රෙ වත්තබ්බෙ: විඤ්ඤාණක්ඛන්ධො සඞ්ඛාරක්ඛන්ධෙන සම්පයුත්තො’ති.
ප. පු: යථා තීලම්හි තෙලං අනුගතං අනුපවිට්ඨං, උච්ඡුම්හි රසො අනුගතො අනුපවිට්ඨො, එවමෙව තෙ ධම්මා තෙහි ධම්මෙහි අනුගතා අනුපවිට්ඨා’ති.
ස. පටි: න හෙවං වත්තබ්බෙ -පෙ-
සම්පයුත්තකථා නිට්ඨිතා.
7. 3.
චෙතසිකකථා.
1. ස. පු: නත්ථී චෙතසිකො ධම්මො’ති.
ප. පටිඤ්ඤා: ආමන්තා.
ස. අනු: නනු අත්ථී කෙචි ධම්මා චිත්තෙන සහගතා සහජාතා සංසට්ඨා සම්පයුත්තා එකුප්පාදා එකනිරොධා එකවත්ථුකා එකාරම්මණා’ති.
ප. පටිඤ්ඤා: ආමන්තා.
අනු. ඨ: හඤ්චි අත්ථී කෙචි ධම්මා චිත්තෙන සහගතා සහජාතා සංසට්ඨා සම්පයුත්තා එකුප්පාදා එකනිරොධා එකවත්ථුකා එකාරම්මණා,
අනු. පා: නො ච වත රෙ වත්තබ්බෙ: නත්ථී චෙතසිකො ධම්මො’ති.
2. ස. පු: ඵස්සො චිත්තෙන සහජාතො’ති.
ප. පටිඤ්ඤා: ආමන්තා.
අනු ඨ: හඤ්චි ඵස්සො චිත්තෙන සහජාතො,
අනු. පා: තෙන වත රෙ වත්තබ්බෙ: ඵස්සො චෙතසිකො’ති.
3. ස. පු: වෙදනා -පෙ- සඤ්ඤා -පෙ- චෙතනා -පෙ- සද්ධා -පෙ- විරියං -පෙ- සති -පෙ- සමාධි -පෙ- පඤ්ඤා -පෙ- රාගො -පෙ- දොසො -පෙ- මොහො -පෙ- අනොත්තප්පං චිත්තෙන සහජාතන්ති.
ප. පටිඤ්ඤා: ආමන්තා.
අනු ඨ: හඤ්චි අනොත්තප්පං චිත්තෙන සහජාතං,
අනු. පා: තෙන වත රෙ වත්තබ්බෙ: අනොත්තප්පං චෙතසිකන්ති.
4. ප. පු: ‘චිත්තෙන සහජාතා’ති කත්වා චෙතසිකා’ති.
ස. පටිඤ්ඤා: ආමන්තා.
ප. අනු: ‘ඵස්සෙන සහජාතා’ති කත්වා ඵස්සිකා’ති.
ස. පටිඤ්ඤා: ආමන්තා.