7. 3.
චෙතසිකකථා.
1. ස. පු: නත්ථී චෙතසිකො ධම්මො’ති.
ප. පටිඤ්ඤා: ආමන්තා.
ස. අනු: නනු අත්ථී කෙචි ධම්මා චිත්තෙන සහගතා සහජාතා සංසට්ඨා සම්පයුත්තා එකුප්පාදා එකනිරොධා එකවත්ථුකා එකාරම්මණා’ති.
ප. පටිඤ්ඤා: ආමන්තා.
අනු. ඨ: හඤ්චි අත්ථී කෙචි ධම්මා චිත්තෙන සහගතා සහජාතා සංසට්ඨා සම්පයුත්තා එකුප්පාදා එකනිරොධා එකවත්ථුකා එකාරම්මණා,
අනු. පා: නො ච වත රෙ වත්තබ්බෙ: නත්ථී චෙතසිකො ධම්මො’ති.
2. ස. පු: ඵස්සො චිත්තෙන සහජාතො’ති.
ප. පටිඤ්ඤා: ආමන්තා.
අනු ඨ: හඤ්චි ඵස්සො චිත්තෙන සහජාතො,
අනු. පා: තෙන වත රෙ වත්තබ්බෙ: ඵස්සො චෙතසිකො’ති.
3. ස. පු: වෙදනා -පෙ- සඤ්ඤා -පෙ- චෙතනා -පෙ- සද්ධා -පෙ- විරියං -පෙ- සති -පෙ- සමාධි -පෙ- පඤ්ඤා -පෙ- රාගො -පෙ- දොසො -පෙ- මොහො -පෙ- අනොත්තප්පං චිත්තෙන සහජාතන්ති.
ප. පටිඤ්ඤා: ආමන්තා.
අනු ඨ: හඤ්චි අනොත්තප්පං චිත්තෙන සහජාතං,
අනු. පා: තෙන වත රෙ වත්තබ්බෙ: අනොත්තප්පං චෙතසිකන්ති.
4. ප. පු: ‘චිත්තෙන සහජාතා’ති කත්වා චෙතසිකා’ති.
ස. පටිඤ්ඤා: ආමන්තා.
ප. අනු: ‘ඵස්සෙන සහජාතා’ති කත්වා ඵස්සිකා’ති.
ස. පටිඤ්ඤා: ආමන්තා.
ප. පු: ‘චිත්තෙන සහජාතා’ති කත්වා චෙතසිකා’ති.
ස. පටිඤ්ඤා: ආමන්තා.
ප. අනු: වෙදනාය -පෙ- සඤ්ඤාය -පෙ- චෙතනාය -පෙ- සද්ධාය -පෙ- විරියෙන -පෙ- සතියා -පෙ- සමාධිනා -පෙ- පඤ්ඤාය -පෙ- රාගෙන -පෙ- දොසෙන -පෙ- මොහෙන -පෙ- අනොත්තප්පෙන සහජාතා’ති කත්වා අනොත්තප්පිකා’ති.
ස. පටිඤ්ඤා: ආමන්තා.
5. ස. පු: නත්ථී චෙතසිකො ධම්මො’ති.
ප. පටිඤ්ඤා: ආමන්තා.
ස. අනු: නනු වුත්තං භගවතා:
“චිත්තං හිදං චෙතසිකා ච ධම්මා
අනත්තතො සංවිදිතස්ස හොන්ති.
හීනප්පණීතං තදුභයෙ විදිත්වා
සම්මද්දසො වෙදි පලොකධම්මන්ති”
අත්ථෙ’ව සුත්තන්තො’ති.
ප. පටිඤ්ඤා: ආමන්තා.
ස. නිග: තෙන හි අත්ථී ‘චෙතසිකො ධම්මො’ති.
6. ස. පු: නත්ථී චෙතසිකො ධම්මො’ති.
ප. පටිඤ්ඤා: ආමන්තා.
ස. අනු: නනු වුත්තං භගවතා “ඉධ කෙවට්ට භික්ඛු පරසත්තානං පරපුග්ගලානං චිත්තම්පි ආදිසති, චෙතසිකම්පි ආදිසති, විතක්කිතම්පි ආදිසති, විචාරිතම්පි ආදිසති: එවම්පි තෙ මනො. ඉත්ථම්පි තෙ මනො. ඉතිපි තෙ චිත්ත’න්ති” අත්ථෙ’ව සුත්තන්තො’ති.
ප. පටිඤ්ඤා: ආමන්තා.
ස. නිග: තෙන හි ‘අත්ථී චෙතසිකො ධම්මො’ති.
චෙතසිකකථා නිට්ඨිතා.