1. ස. පු: ලක්ඛණසමන්නාගතො බොධිසත්තො’ති.

ප. පටිඤ්ඤා: ආමන්තා.

ස. අනු: පදෙසලක්ඛණෙහි සමන්නාගතො පදෙසබොධිසත්තො’ති.

ප. පටි: න හෙවං වත්තබ්බෙ -පෙ-

2. ස. පු: ලක්ඛණසමන්නාගතො බොධිසත්තො’ති.

ප. පටිඤ්ඤා: ආමන්තා.

ස. අනු: තිභාගලක්ඛණෙහි සමන්නාගතො තිභාගබොධිසත්තො’ති.

ප. පටි: න හෙවං වත්තබ්බෙ -පෙ-

3. ස. පු: ලක්ඛණසමන්නාගතො බොධිසත්තො’ති.

ප. පටිඤ්ඤා: ආමන්තා.

ස. අනු: උපඩ්ඪලක්ඛණෙහි සමන්නාගතො උපඩ්ඪබොධිසත්තො’ති.

ප. පටි: න හෙවං වත්තබ්බෙ -පෙ-

4. ස. පු: ලක්ඛණසමන්නාගතො බොධිසත්තො’ති.

ප. පටිඤ්ඤා: ආමන්තා.

ස. අනු: චක්කවත්තිසත්තො ලක්ඛණසමන්නාගතො. චක්කවත්තිසත්තො බොධිසත්තො’ති.

ප. පටි: න හෙවං වත්තබ්බෙ -පෙ-

5. ස. පු: චක්කවත්තිසත්තො ලක්ඛණසමන්නාගතො. චක්කවත්තිසත්තො බොධිසත්තො’ති.

ප. පටිඤ්ඤා: ආමන්තා.

ස. අනු: යාදිසො බොධිසත්තස්ස පුබ්බයොගො පුබ්බචරියා ධම්මක්ඛානං ධම්මදෙසනා, තාදිසො චක්කවත්තිසත්තස්ස පුබ්බයොගො පුබ්බචරියා ධම්මක්ඛානං ධම්මදෙසනා’ති.

ප. පටි: න හෙවං වත්තබ්බෙ -පෙ-

ස. අනු: යථා බොධිසත්තස්ස ජායමානස්ස දෙවා පඨමං පටිගණ්හන්ති පච්ඡා මනුස්සා, එවමෙවං චක්කවත්තිසත්තස්ස ජායමානස්ස දෙවා පඨමං පටිගණ්හන්ති පච්ඡා මනුස්සා’ති.

ප. පටි: න හෙවං වත්තබ්බෙ -පෙ-

6. ස. පු: යථා බොධිසත්තස්ස ජායමානස්ස චත්තාරො නං දෙවපුත්තා පටිග්ගහෙත්වා මාතු පුරතො ඨපෙන්ති ‘අත්තමනා දෙවි හොහි, මහෙසක්ඛො තව පුත්තො උප්පන්නො’ති, එවමෙවං චක්කවත්ති සත්තස්ස ජායමානස්ස චත්තාරො නං දෙවපුත්තා, පටිග්ගහෙත්වා මාතු පුරතො ඨපෙන්ති ‘අත්තමනා දෙවි හොහි මහෙසක්ඛො තව පුත්තො උප්පන්නො’ති.

ප. පටි: න හෙවං වත්තබ්බෙ -පෙ-

ස. අනු: යථා බොධිසත්තස්ස ජායමානස්ස ද්වෙ උදකධාරා අන්තලික්ඛා පාතුභවන්ති: එකා සීතස්ස එකා උණ්හස්ස, යෙන බොධිසත්තස්ස උදකකිච්චං කරොන්ති මාතු ච, එවමෙවං චක්කවත්තිස්ස ජායමානස්ස ද්වෙ උදකධාරා අන්තලික්ඛා පාතුභවන්ති: එකා සීතස්ස එකා උණ්හස්ස, යෙන චක්කවත්තිසත්තස්ස උදකකිච්චං කරොන්ති මාතු චාති.

ප. පටි: න හෙවං වත්තබ්බෙ -පෙ-

ස. අනු: යථා සම්පතිජාතො බොධිසත්තො සමෙහි පාදෙහි පතිට්ඨහිත්වා උත්තරෙන අභිමුඛො සත්තපදවීතිහාරෙන ගච්ඡති, සෙතම්හි ඡත්තෙ අනුධාරියමානෙ සබ්බා ච දිසා විලොකෙති, ආසභිඤ්ච වාචං භාසති: අග්ගොහමස්මි ලොකස්ස, ජෙට්ඨොහමස්මි ලොකස්ස, සොට්ඨොහමස්මි ලොකස්ස, අයමන්තිමාජාති, නත්ථී දානි පුනබ්භවො’ති, එවමෙවං සම්පතිජාතො චක්කවත්තිසත්තො සමෙහි පාදෙහි පතිට්ඨහිත්වා උත්තරෙන අභිමුඛො සත්තපදවීතිහාරෙන ගච්ඡති, සෙතම්හි ඡත්තෙ අනුධාරියමානෙ සබ්බා ච දිසා විලොකෙති, ආසභිඤ්ච වාචං භාසති. අග්ගොසහස්මි -පෙ- පුනබ්භවො’ති.

ප. පටි: න හෙවං වත්තබ්බෙ -පෙ-