1. ස. පු: ගිහිස්ස අරහා’ති

ප. පටිඤ්ඤා: ආමන්තා.

ස. අනු: අත්ථී අරහතො ගිහීසඤ්ඤොජනන්ති.

ප. පටි: න හෙවං වත්තබ්බෙ -පෙ-

2. ස. පු: නත්ථී අරහතො ගිහීසඤ්ඤොජනන්ති.

ප. පටිඤ්ඤා: ආමන්තා.

අනු. ඨ: හඤ්චි නත්ථී අරහතො ගිහීසඤ්ඤොජනං,

අනු. පා: නො ච වත රෙ වත්තබ්බෙ ගිහිස්ස අරහා’ති.

3. ස. පු: ගිහිස්ස අරහා’ති.

ප. පටිඤ්ඤා: ආමන්තා.

ස. අනු: නනු අරහතො ගිහීසඤ්ඤොජනං පහීනං උච්ඡින්නමූලං තාලාවත්ථුකතං අනභාවං කතං ආයතිං අනුප්පාදධම්මන්ති.

ප. පටිඤ්ඤා: ආමන්තා.

අනු. ඨ: හඤ්චි අරහතො ගිහීසඤ්ඤොජනං පහීනං උච්ඡින්නමූලං තාලාවත්ථුකතං අනභාවං කතං ආයතිං අනුප්පාදධම්මං,

අනු. පා: නො ච වත රෙ වත්තබ්බෙ ගිහිස්ස අරහා’ති.

4. ස. පු: ගිහිස්ස අරහා’ති.

ප. පටිඤ්ඤා: ආමන්තා.

ස. අනු: අත්ථී කොචි ගිහී ගිහීසඤ්ඤොජනං අප්පහාය දිට්ඨෙව ධම්මෙ දුක්ඛස්සන්තකරො’ති.

ප. පටිඤ්ඤා: නත්ථී.

අනු. ඨ: හඤ්චි නත්ථී කොචි ගිහී ගිහීසඤ්ඤොජනං අප්පහාය දිට්ඨෙව ධම්මෙ දුක්ඛස්සන්තකරො,

අනු. පා: නො ච වත රෙ වත්තබ්බෙ ගිහිස්ස අරහා’ති.

5. ස. පු: ගිහිස්ස අරහාති.

ප. පටිඤ්ඤා: ආමන්තා.

ස. අනු: නනු වච්ඡගොත්තො පරිබ්බාජකො භගවන්තං එතදවොච: “අත්ථී නු ඛො භො ගොතම, කොචි ගිහී ගිහීසඤ්ඤොජනං අප්පහාය කායස්ස භෙදා දුක්ඛස්සන්තකරො’ති. නත්ථී ඛො වච්ඡ, කොචි ගිහී ගිහීසඤ්ඤොජනං අප්පහාය කායස්ස භෙදා දුක්ඛස්සන්තකරො”ති අත්ථෙව සුත්තන්තොති.

ප. පටිඤ්ඤා: ආමන්තා.

අනු. පා: තෙන හි න වත්තබ්බං ‘ගිහිස්ස අරහා’ති

6. ස. පු: ගිහිස්ස අරහාති.

ප. පටිඤ්ඤා: ආමන්තා.

ස. අනු: අරහා මෙථුනං ධම්මං පතිසෙවෙය්ය, මෙථුනං ධම්මං උප්පාදෙය්ය, පුත්තසම්බාධසයනං අජ්ඣාවසෙය්ය, කාසිකචන්දනං පච්චනුභවෙය්ය, මාලාගන්ධවිලෙපනං ධාරෙය්ය, ජාතරූපරජතං සාදියෙය්ය, අජෙළකං පටිගණ්හෙය්ය, කුක්කුටසූකරං පටිගණ්හෙය්ය,2 හත්ථිගවාස්සවළවං පටිගණ්හෙය්ය,2 තිත්තිරවට්ටකමොරකපිඤ්ජරං පටිගණ්හෙය්ය, පීතවණ්ටවාලමොළිකං ධාරෙය්ය, ඔදාතානි වත්ථානි දීඝදසානි ධාරෙය්ය, යාවජීවං අගාරියභූතො අස්සා’ති.

ප. පටි: න හෙවං වත්තබ්බෙ -පෙ-

7. ස. පු: න වත්තබ්බං ‘ගිහිස්ස අරහා’ති.

ප. පටිඤ්ඤා: ආමන්තා.

ප. අනු: නනු යසො කුලපුත්තො, උත්තියො ගහපති, සෙතුමාණවො ගිහීබ්යඤ්ජනෙන අරහත්තං පත්තො’ති.

ස. පටිඤ්ඤා: ආමන්තා.

අනු. ඨ: හඤ්චි යසො කුලපුත්තො, උත්තියො ගහපති, සෙතුමාණවො ගිහීබ්යඤ්ජනෙන අරහත්තං පත්තො.

අනු. පා: තෙන වත රෙ වත්තබෙබ ‘ගිහිස්ස අරහා’ති.