1. ස. පු: සමාපන්නො සද්දං සුණාතී’ති.

ප. පටිඤ්ඤා: ආමන්තා.

ස. අනු: සමාපන්නො චක්ඛුනා රූපං පස්සති -පෙ- සොතෙන -පෙ- ඝානෙන -පෙ- ජිව්හාය -පෙ- කායෙන ඵොට්ඨබ්බං ඵුසති’ති.

ප. පටි: න හෙවං වත්තබ්බෙ -පෙ-

2. ස. පු: සමාපන්නො සද්දං සුණාතී’ති.

ප. පටිඤ්ඤා: ආමන්තා.

ස. අනු: සොතවිඤ්ඤාණසමඞ්ගී සමාපන්නො’ති.

ප. පටි: න හෙවං වත්තබ්බෙ -පෙ-

ස. අනු: නනු සමාධි මනොවිඤ්ඤාණසමඞ්ගිස්සා’ති.

ප. පටිඤ්ඤා: ආමන්තා.

ස. ඨ: හඤ්චි සමාධි මනොවිඤ්ඤාණසමඞ්ගිස්ස.

ස. පා: නො ච වත රෙ වත්තබ්බෙ “සමාපන්නො සද්දං සුණාතී”ති.

3. ස. පු: සමාධි මනොවිඤ්ඤාණසමඞ්ගිස්ස, සොතවිඤ්ඤාණසමඞ්ගී සද්දං සුණාති’ති.

ප. පටිඤ්ඤා: ආමන්තා.

ස. ඨ: හඤ්චි සමාධි මනොවිඤ්ඤාණසමඞ්ගිස්ස, සොතවිඤ්ඤාණසමඞ්ගී සද්දං සුණාති,

ස. පා: නො ච වත රෙ වත්තබ්බෙ “සමාපන්නො සද්දං සුණාතී”ති.

4. ස. පු: සමාධි මනොවිඤ්ඤාණසමඞ්ගිස්ස, සොතවිඤ්ඤාණසමඞ්ගී සද්දං සුණාතී’ති.

ප. පටිඤ්ඤා: ආමන්තා.

ස. අනු: අද්වින්නං ඵස්සානං -පෙ- ද්වින්නං චිත්තානං සමොධානං හොතී’ති.

ප. පටි: න හෙවං වත්තබ්බෙ -පෙ-

5. ප. පු: න වත්තබ්බං සමාපන්නො සද්දං සුණාතී’ති.

ස. පටිඤ්ඤා: ආමන්තා.

ප. අනු: නනු පඨමස්ස ඣානස්ස සද්දො කණ්ටකො වුත්තො භගවතා’ති.

ස. පටිඤ්ඤා: ආමන්තා.

ප. ඨ: හඤ්චි පඨමස්ස ඣානස්ස සද්දො කණ්ටකො වුත්තො භගවතා,

ප. පා: තෙන වත රෙ වත්තබ්බෙ “සමාපන්නො සද්දං සුණාතී”ති.

6. ස. පු: “පඨමස්ස ඣානස්ස සද්දො කණ්ටකො වුත්තො භගවතා’ති. සමාපන්නො සද්දං සුණාතී”ති.

ප. පටිඤ්ඤා: ආමන්තා.

ස. අනු: දුතියස්ස ඣානස්ස විතක්කො විචාරො කණ්ටකො වුත්තො භගවතා, අත්ථි තස්ස විතක්කවිචාරා’ති.

ප. පටි: න හෙවං වත්තබ්බෙ -පෙ-

7. ස. පු: “පඨමස්ස ඣානස්ස සද්දො කණ්ටකො වුත්තො භගවතා’ති. සමාපන්නො සද්දං සුණාතී”ති.

ප. පටිඤ්ඤා: ආමන්තා.

ස. අනු: තතියස්ස ඣානස්ස පීති කණ්ටකො -පෙ- චතුත්ථස්ස ඣානස්ස අස්සාසපස්සාසා කණ්ටකො, ... ආකාසානඤ්චායතනං සමාපන්නස්ස රූපසඤ්ඤා කණ්ටකො ... විඤ්ඤාණඤ්චායතනං සමාපන්නස්ස ආකාසානඤ්චායතනසඤ්ඤා කණ්ටකො ... ආකිඤ්චඤ්ඤායතනං සමාපන්නස්ස විඤ්ඤාණඤ්චායතනසඤ්ඤා කණ්ටකො ... නෙවසඤ්ඤා නාසඤ්ඤායතනං සමාපන්නස්ස ආකිඤ්චඤ්ඤායතනසඤ්ඤා කණ්ටකො ... සඤ්ඤාවෙදයිතනිරොධං සමාපන්නස්ස සඤ්ඤා ච වෙදනා ච කණ්ටකො වුත්තො භගවතා, අත්ථි තස්ස සඤ්ඤා ච වෙදනා චා’ති.

ප. පටි: න හෙවං වත්තබ්බෙ -පෙ-