1. ස. පු: න වත්තබ්බං බුද්ධො භගවා මනුස්සලොකෙ අට්ඨාසී’ති.

ප. පටිඤ්ඤා: ආමන්තා.

ස. අනු: නනු අත්ථි බුද්ධවුත්ථානි චෙතියානි ආරාමවිහාරගාමනිගමනගරානි රට්ඨානි ජනපදානී’ති.

ප. පටිඤ්ඤා: ආමන්තා.

ස. ඨ: හඤ්චි අත්ථි බුද්ධවුත්ථානි චෙතියානි ආරමවිහාරගාමනිගමනගරානි රට්ඨානි ජනපදානි,

ස. පා: තෙන වත රෙ වත්තබ්බෙ “බුද්ධො භගවා මනුස්සලොකෙ අට්ඨාසී”ති.

2. ස. පු: න වත්තබ්බං “බුද්ධො භගවා මනුස්සලොකෙ අට්ඨාසී”ති.

ප. පටිඤ්ඤා: ආමන්තා.

ස. අනු: නනු භගවා ලුම්බිනියා ජාතො, බොධියා මූලෙ අභිසම්බුද්ධො, බාරාණසියං භගවතා ධම්මචක්කං පවත්තිතං, චාපාලෙ චෙතියෙ ආයුසඞ්ඛාරො ඔස්සට්ඨො, කුසිනාරායං භගවා පරිනිබ්බුතො’ති.

ප. පටිඤ්ඤා: ආමන්තා.

ස. ඨ: හඤ්චි භගවා ලුම්බිනියා ජාතො -පෙ- කුසිනාරායං භගවා පරිනිබ්බුතො.

ස. පා: තෙන වත රෙ වත්තබ්බෙ “බුද්ධො භගවා මනුස්සලොකෙ අට්ඨාසී”ති.

3. ස. පු: න වත්තබ්බං “බුද්ධො භගවා මනුස්සලොකෙ අට්ඨාසී”ති.

ප. පටිඤ්ඤා: ආමන්තා.

ස. අනු: නනු වුත්තං භගවතා “එකමිදාහං භික්ඛවෙ සමයං උක්කට්ඨායං විහරාමි සුභගවනෙ සාලරාජමූලෙ”ති “එකමිදාහං භික්ඛවෙ සමයං උරුවෙලායං විහරාමි අජපාලෙ නිග්රොධෙ පඨමාභිසම්බුද්ධො”ති. “එකමිදාහං භික්ඛවෙ සමයං රාජගහෙ විහරාමි වෙළුවනෙ කලන්දකනිවාපෙ”ති. “එකමිදාහං භික්ඛවෙ සමයං සාවත්ථියං විහරාමි ජෙතවනෙ අනාථපිණ්ඩිකස්ස ආරාමෙ”ති. “එකමිදාහං භික්ඛවෙ සමයං වෙසාලියං විහරාමි මහාවනෙ කූටාගාරසාලාය”න්ති අත්ථෙව සුත්තන්තො’ති.

ප. පටිඤ්ඤා: ආමන්තා.

ස. පා: තෙන හි බුද්ධො භගවා මනුස්සලොකෙ අට්ඨාසී’ති.

4. ප. පු: භගවා මනුස්සලොකො අට්ඨාසී’ති.

ස. පටිඤ්ඤා: ආමන්තා.

ප. අනු: නනු භගවා ලොකෙ ජාතො ලොකෙ සංවද්ධො ලොකං අභිභුය්ය විහරති අනුපලිත්තො ලොකෙනා’ති.

ස. පටිඤ්ඤා: ආමන්තා.

ප. ඨ: හඤ්චි භගවා ලොකෙ ජාතො ලොකෙ සංවද්ධො ලොකං අභිභුය්ය විහරති අනුපලිත්තො ලොකෙන,

ප. පා: නො ච වත රෙ වත්තබ්බෙ “බුද්ධො භගවා මනුස්සලොකෙ අට්ඨාසී”ති.