18. 2.
ධම්මදෙසනා කථා.
1. ස. පු: න වත්තබ්බං “බුද්ධෙන භගවතා ධම්මො දෙසිතො”ති.
ප. පටිඤ්ඤා: ආමන්තා.
ස. පු: කෙන දෙසිතො’ති.
ප. වි: අභිනිම්මිතෙන දෙසිතො’ති.
ස. අනු: අභිනිම්මිතො ජිනො සත්ථා සම්මාසම්බුද්ධො සබ්බඤ්ඤූ සබ්බදස්සාවී ධම්මස්සාමී ධම්මපටිසරණො’ති.
ප. පටි: න හෙවං වත්තබ්බෙ -පෙ-
2. ස. පු: න වත්තබ්බං “බුද්ධෙන භගවතා ධම්මො දෙසිතො”ති.
ප. පටිඤ්ඤා: ආමන්තා.
ස. පු: කෙන දෙසිතො’ති.
ප. වි: ආයස්මතා ආනන්දෙන දෙසිතො’ති.
ස. අනු: ආයස්මා ආනන්දො ජිනො සත්ථා සම්මාසම්බුද්ධො සබ්බඤ්ඤූ සබ්බදස්සාවී ධම්මස්සාමී ධම්මපටිසරණො”ති.
ප. පටි: න හෙවං වත්තබ්බෙ -පෙ-
3. ස. පු: න වත්තබ්බං “බුද්ධෙන භගවතා ධම්මො දෙසිතො”ති.
ප. පටිඤ්ඤා: ආමන්තා.
ස. අනු: නනු වුත්තං භගවතා “සඞ්ඛිත්තෙන’පි කො අහං සාරිපුත්ත ධම්මං දෙසෙය්යං, විත්ථාරෙන’පි ඛො අහං සාරිපුත්ත ධම්මං දෙසෙය්යං, සංඛිත්තවිත්ථාරෙන’පි ඛො අහං සාරිපුත්ත ධම්මං දෙසෙය්යං. අඤ්ඤාතාරො ච දුල්ලභා”ති අත්ථෙ’ව සුත්තන්තො’ති.
ප. පටිඤ්ඤා: ආමන්තා.
ස. පා: තෙන හි “බුද්ධෙන භගවතා ධම්මො දෙසිතො”ති.
4. ස. පු: න වත්තබ්බං “බුද්ධෙන භගවතා ධම්මො දෙසිතො”ති.
ප. පටිඤ්ඤා ආමන්තා.
ස. අනු: නනු වුත්තං භගවතා “අභිඤ්ඤායාහං භික්ඛවෙ ධම්මං දෙසෙමි නො අනභිඤ්ඤාය. සනිදානාහං භික්ඛවෙ ධම්මං දෙසෙමි නො අනිදානං. සප්පටිහාරියං. තස්ස මය්හං භික්ඛවෙ අභිඤ්ඤාය ධම්මං දෙසයතො නො අනභිඤ්ඤාය, සනිදානං ධම්මං දෙසයතො නො අනිදානං, සප්පටිහාරියං ධම්මං දෙසයතො නො අප්පාටිහාරියං, කරණීයො ඔවාදො, කරණීයා අනුසාසනී, අලඤ්ච පන වො භික්ඛවෙ තුට්ඨියා, අලං අත්තමනතාය, අලං සොමනස්සාය, ‘සම්මාසම්බුද්ධො භගවා, ස්වාක්ඛාතො ධම්මො, සුපටිපන්නො සඞ්ඝො”ති. ඉමස්මිඤ්ච පන වෙය්යාකරණස්මිං භඤ්ඤමානෙ දසසහස්සීලොකධාතු අකම්පිත්ථා’ති. අත්ථෙව සුත්තන්තො’ති.
ප. පටිඤ්ඤා: ආමන්තා.
ස. පා: තෙන හි “බුද්ධෙන භගවතා ධම්මො දෙසිතො”ති.
ධම්මදෙසනාකථා නිට්ඨිතා.