1. ස. පු: න වත්තබ්බං ‘සඞ්ඝො භුඤ්ජති, පිවති, ඛාදති, සායතී’ති.

ප. පටිඤ්ඤා: ආමන්තා.

ස. අනු: නනු අත්ථි කෙචි සඞ්ඝභත්තානි කරොන්ති, උද්දෙසභත්තානි කරොන්ති, යාගුපානානි කරොන්තී’ති.

ප. පටිඤ්ඤා: ආමන්තා.

ස. ඨ: හඤ්චි අත්ථි කෙචි සඞ්ඝභත්තානි කරොන්ති, උද්දෙසභත්තානි කරොන්ති, යාගුපානානි කරොන්ති.

ස. පා: තෙන වත රෙ වත්තබ්බෙ “සඞ්ඝො භුඤ්ජති, පිවති, ඛාදති, සායතී’ති.

2. ස. පු: න වත්තබ්බං ‘සඞ්ඝො භුඤ්ජති, පිවති ඛාදති, සායතී’ති.

ප. පටිඤ්ඤා: ආමන්තා.

ස. අනු: නනු වුත්තං භගවතා “ගණභොජනං පරම්පරභොජනං අතිරිත්තභොජනං අනතිරිත්තභොජන”න්ති.

ප. පටිඤ්ඤා: ආමන්තා.

ස. ඨ: හඤ්චි වුත්තං භගවතා ගණභොජනං පරම්පරභොජනං අතිරිත්තභොජනං අනතිරිත්තභොජනං,

ස. පා: තෙන වත රෙ වත්තබ්බෙ “සඞ්ඝො භුඤ්ජති, පිවති, ඛාදති, සායතී”ති.

3. ස. පු: න වත්තබ්බං ‘සඞ්ඝො භුඤ්ජති, පිවති ඛාදති සායතී’ති.

ප. පටිඤ්ඤා: ආමන්තා.

ස. අනු: නනු අට්ඨපානානි වුත්තානි භගවතා: ‘අම්බපානං ජම්බුපානං චොචපානං මොචපානං මධුපානං මුද්දිකපානං සාලුකපානං ඵාරුසකපානන්ති.

ප. පටිඤ්ඤා: ආමන්තා.

ස. ඨ: හඤ්චි අට්ඨපානානි වුත්තානි භගවතා: ‘අම්බපානං ජම්බුපානං චොචපානං මොචපානං මධුපානං මුද්දිකපානං සාලුකපානං ඵාරුසකපානං,

ස. පා: තෙන වත රෙ වත්තබ්බෙ ‘සඞ්ඝො භුඤ්ජති පිවති ඛාදති සායතී’ති.

4. ස. පු: සඞ්ඝො භුඤ්ජති පිවති ඛාදති සායතී’ති.

ස. පටිඤ්ඤා: ආමන්තා.

ප. අනු: මග්ගො භුඤ්ජති පිවති ඛාදති සායති, ඵලං භුඤ්ජති පිවති ඛාදති සායතී’ති.

ස. පටි: න හෙවං වත්තබ්බෙ -පෙ-