17. 7.
න වත්තබ්බං සඞ්ඝො දක්ඛිණං විසොධෙතීති කථා.
1. ස. පු: න වත්තබ්බං සඞ්ඝො දක්ඛිණං විසොධෙතීති.
ප. පටිඤ්ඤා: ආමන්තා.
ස. අනු: නනු සඞ්ඝො ආහුනෙය්යො පාහුනෙය්යො දක්ඛිණෙය්යො අඤ්ජලිකරණීයො අනුත්තරං පුඤ්ඤක්ඛෙත්තං ලොකස්සාති.
ස. පටිඤ්ඤා: ආමන්තා.
ස. ඨ: හඤ්චි සඞ්ඝො ආහුනෙය්යො -පෙ- අනුත්තරං පුඤ්ඤක්ඛෙත්තං ලොකස්ස,
ස. පා: තෙන වත රෙ වත්තබ්බෙ “සඞ්ඝො දක්ඛිණං විසොධෙතී”ති.
2. ස. පු: න වත්තබ්බං සඞ්ඝො දක්ඛිණං විසොධෙතීති.
ප. පටිඤ්ඤා: ආමන්තා.
ස. අනු: නනු චත්තාරො පුරිසයුගා අට්ඨපුරිසපුග්ගලා දක්ඛිණෙය්යා වුත්තා භගවතාති.
ප. පටිඤ්ඤා: ආමන්තා.
ස. ඨ: හඤ්චි චත්තාරො පුරිසයුගා අට්ඨපුරිසපුග්ගලා දක්ඛිණෙය්යා වුත්තා භගවතා,
ස. පා: තෙන වත රෙ වත්තබ්බෙ “සඞ්ඝො දක්ඛිණං විසොධෙතී”ති.
3. ස. පු: න වත්තබ්බං සඞ්ඝො දක්ඛිණං විසොධෙතී’ති.
ප. පටිඤ්ඤා: ආමන්තා.
ස. අනු: නනු අත්ථි කෙචි සඞ්ඝස්ස දානං දත්වා දක්ඛිණං ආරාධෙන්තී’ති.
ප. පටිඤ්ඤා: ආමන්තා.
ස. ඨ: හඤ්චි ‘අත්ථි කෙචි සඞ්ඝස්ස දානං දත්වා දක්ඛිණං ආරාධෙන්ති,
ස. පා: තෙන වත රෙ වත්තබ්බෙ “සඞ්ඝො දක්ඛිණං විසොධෙතී”ති.
ස. අනු: නනු අත්ථි කෙචි සඞ්ඝස්ස චීවරං දත්වා -පෙ- පිණ්ඩපාතං දත්වා -පෙ- සෙනාසනං දත්වා -පෙ- ගිලානපච්චයභෙසජ්ජපරික්ඛාරං දත්වා -පෙ- ඛාදනීයං දත්වා -පෙ- භොජනීයං දත්වා -පෙ- පානීයං දත්වා දක්ඛිණං ආරාධෙන්තීති.
ප. පටිඤ්ඤා: ආමන්තා.
ස. ඨ: හඤ්චි අත්ථි කෙචි සඞ්ඝස්ස පානීයං දත්වා දක්ඛිණං ආරාධෙන්ති,
ස. පා: තෙන වත රෙ වත්තබ්බෙ: “සඞ්ඝො දක්ඛිණං විසොධෙතී”ති.
4. ප. පු: සඞ්ඝො දක්ඛිණං විසොධෙතීති.
ස. පටිඤ්ඤා: ආමන්තා.
ප. අනු: මග්ගො විසොධෙති, ඵලං විසොධෙතීති.
ස. පටි: න හෙවං වත්තබ්බෙ -පෙ-
න වත්තබ්බං සඞ්ඝො දක්ඛිණං විසොධෙතීති කථා නිට්ඨිතා.