14. 6.
පරියුට්ඨානං චිත්තවිප්පයුත්තන්තිකථා.
1. ස. පු: පරියුට්ඨානං චිත්තවිප්පයුත්තන්ති.
ප. පටිඤ්ඤා: ආමන්තා.
ස. අනු: රූපං නිබ්බානං චක්ඛායතනං -පෙ- ඵොට්ඨබ්බායතනන්ති.
ප. පටි: න හෙවං වත්තබ්බෙ -පෙ-
2. ස. පු: පරියුට්ඨානං චිත්තවිප්පයුත්තන්ති.
ප. පටිඤ්ඤා: ආමන්තා.
ස. අනු: නත්ථි සරාගං චිත්තං, සදොසං චිත්තං, සමොහං චිත්තං -පෙ- අකුසලං චිත්තං, සංකිලිට්ඨං චිත්තන්ති.
ප. පටි: න හෙවං වත්තබ්බෙ -පෙ-
ස. අනු: නනු අත්ථි සරාගං චිත්තං, සදොසං චිත්තං, සමොහං චිත්තං, -පෙ- අකුසලං චිත්තං සංකිලිට්ඨං චිත්තන්ති.
ප. පටිඤ්ඤා: ආමන්තා.
අනු. ඨ: හඤ්චි අත්ථි සරාගං චිත්තං, සදොසං චිත්තං, සමොහං චිත්තං -පෙ- අකුසලං චිත්තං සංකිලිට්ඨං චිත්තං,
අනු. පා: නො ච වත රෙ වත්තබ්බෙ ‘පරියුට්ඨානං චිත්තවිප්පයුත්ත’න්ති.
පරියුට්ඨානං චිත්තවිප්පයුත්තන්තිකථා නිට්ඨිතා.
14. 7.
පරියාපන්නකථා.
1. ස. පු: රූපරාගො රූපධාතුං අනුසෙති, රූපධාතුපරියාපන්නො’ති.
ප. පටිඤ්ඤා: ආමන්තා.
ස. අනු: සමාපත්තෙසියො උපපත්තෙසියො දිට්ඨධම්මසුඛවිහාරො, සමාපත්තෙසියෙන චිත්තෙන උපපත්තෙසියෙන චිත්තෙන දිට්ඨධම්මසුඛවිහාරෙන චිත්තෙන සහගතො සහජාතො සංසට්ඨො සම්පයුත්තො එකුප්පාදො එකනිරොධො එකවත්ථුකො එකාරම්මණො’ති.
ප. පටි: න හෙවං වත්තබ්බෙ -පෙ-
ස. අනු: නනු න සමාපත්තෙසියො න උපපත්තෙසියො න දිට්ඨධම්මසුඛවිහාරො, න සමාපත්තෙසියෙන චිත්තෙන න උපපත්තෙසියෙන චිත්තෙන න දිට්ඨධම්මසුඛවිහාරෙන චිත්තෙන සහගතො සහජාතො සංසට්ඨො සම්පයුත්තො එකුප්පාදො එකනිරොධො එකවත්ථුකො එකාරම්මණො’ති.
ප. පටිඤ්ඤා: ආමන්තා.
අනු. ඨ, හඤ්චි න සමාපත්තෙසියො න උපපත්තෙසියො න දිට්ඨධම්මසුඛවිහාරො -පෙ- එකාරම්මණො,
අනු. පා: නො ච වත රෙ වත්තබ්බෙ: රූපරාගො රූපධාතුං අනුසෙති, රූපධාතු පරියාපන්නො’ති.
2. ස. පු: රූපරාගො රූපධාතුං අනුසෙති, රූපධාතුපරියාපන්නො’ති.
ප. පටිඤ්ඤා: ආමන්තා.
ස. අනු: සද්දරාගො සද්දධාතුං අනුසෙති, සද්දධාතුපරියාපන්නො’ති.
ප. පටි: න හෙවං වත්තබ්බෙ -පෙ-