1. ස. පු: සමාපන්නො අස්සාදෙති, ඣානනිකන්ති ඣානාරම්මණා’ති.

ප. පටිඤ්ඤා: ආමන්තා.

ස. අනු: තං ඣානං තස්ස ඣානස්ස ආරම්මණන්ති.

ප. පටි: න හෙවං වත්තබ්බෙ -පෙ-

2. ස. පු: තං ඣානං තස්ස ඣානස්ස ආරම්මණන්ති.

ප. පටිඤ්ඤා: ආමන්තා.

ස. අනු: තෙන ඵස්සෙන තං ඵස්සං ඵුසති, තාය වෙදනාය තං වෙදනං වෙදෙති, තාය සඤ්ඤාය තං සඤ්ඤං ජානාති, තාය චෙතනාය තං චෙතනං චෙතෙති, තෙන චිත්තෙන තං චිත්තං චින්තෙති, තෙන විතක්කෙන තං විතක්කං විතක්කෙති, තෙන විචාරෙන තං විචාරං විචාරෙති, තාය පීතියා තං පීති පියායති, තාය සතියා තං සතිං සරති, තාය පඤ්ඤාය තං පඤ්ඤං පජානාතී’ති.

ප. පටි: න හෙවං වත්තබ්බෙ -පෙ-

3. ස. පු: ඣානනිකන්ති චිත්තසම්පයුත්තා, ඣානං චිත්තසම්පයුත්තන්ති.

ප. පටිඤ්ඤා: ආමන්තා.

ස. අනු: ද්වින්නං ඵස්සානං -පෙ- ද්වින්නං චිත්තානං සමොධානං හොතී’ති.

ප. පටි: න හෙවං වත්තබ්බෙ -පෙ-

4. ස. පු: ඣානනිකන්ති අකුසලං, ඣානං කුසලන්ති.

ප. පටිඤ්ඤා: ආමන්තා.

ස. අනු: කුසලාකුසලා සාවජ්ජානවජ්ජා හීනප්පණීතා කණ්හසුක්කසප්පටිභාගා ධම්මා සම්මුඛීභාවං ආගච්ඡන්තී’ති.

ප. පටි: න හෙවං වත්තබ්බෙ -පෙ-

5. ස. පු: කුසලාකුසලා සාවජ්ජානවජ්ජා හීනප්පණීතා කණ්හසුක්කසප්පටිභාගා ධම්මා සම්මුඛීභාවං ආගච්ඡන්තී’ති.

ප. පටිඤ්ඤා: ආමන්තා.

ස. අනු: නනු වුත්තං භගවතා “චත්තාරිමානි භික්ඛවෙ සුවිදූරවිදූරානි. කතමානි චත්තාරි: නභඤ්ච භික්ඛවෙ පඨවී ච, ඉදං පඨමං සුවිදූර විදූරං -පෙ- තස්මා සතං ධම්මො අසබ්භි ආරකා”ති අත්ථෙ’ව සුත්තන්තො’ති.

ප. පටිඤ්ඤා: ආමන්තා.

ස. ආ: තෙන හි න වත්තබ්බං: කුසලාකුසලා සාවජ්ජානවජ්ජා හීනප්පණීතා කණ්හසුක්කසප්පටිභාගා ධම්මා සම්මුඛීභාවං ආගච්ඡන්තී’ති.

6. ප. පු: න වත්තබ්බං “සමාපන්නො අස්සාදෙති. ඣානනිකන්ති ඣානාරම්මණා”ති.

ස. පටිඤ්ඤා: ආමන්තා.

ප. අනු: නනු වුත්තං භගවතා “ඉධ භික්ඛවෙ භික්ඛු විවිච්චෙව කාමෙහි විවිච්ච අකුසලෙහි ධම්මෙහි සවිතක්කං සවිචාරං විවෙකජං පීතිසුඛං පඨමංඣානං උපසම්පජ්ජ විහරති. සො තං අස්සාදෙති. තං නිකාමෙති. තෙන ච විත්තිං ආපජ්ජති. විතක්කවිචාරානං වූපසමා -පෙ- දුතියං ඣානං -පෙ- තතියං ඣානං -පෙ- චතුත්ථං ඣානං උපසම්පජ්ජ විහරති. සො තං අස්සාදෙති. තං නිකාමෙති. තෙන ච විත්තිං ආපජ්ජතී”ති අත්ථෙ’ව සුත්තන්තො’ති.

ස. පටිඤ්ඤා: ආමන්තා.

ප. ආ: තෙන හි “සමාපන්නො අස්සාදෙති, ඣානනිකන්ති ඣානාරම්මණා”ති.