1. ස. පු: අත්ථි අසාතරාගො’ති.

ප. පටිඤ්ඤා: ආමන්තා.

ස. අනු: දුක්ඛාභිනන්දිනො සත්තා අත්ථි කෙචි දුක්ඛං පත්ථෙන්ති පිහෙන්ති එසන්ති ගවෙසන්ති පරියෙසන්ති, දුක්ඛං අජ්ඣොසාය තිට්ඨන්තී’ති.

ප. පටි: න හෙවං වත්තබ්බෙ.

ස. අනු: නනු සුඛාභිනන්දිනො සත්තා අත්ථි කෙචි සුඛං පත්ථෙන්ති පිහෙන්ති එසන්ති ගවෙසන්ති පරියෙසන්ති, සුඛං අජ්ඣොසාය තිට්ඨන්තී’ති.

ප. පටිඤ්ඤා: ආමන්තා.

අනු. ඨ: හඤ්චි සුඛාභිනන්දිනො සත්තා අත්ථි කෙචි සුඛං පත්ථෙන්ති පිහෙන්ති එසන්ති ගවෙසන්ති පරියෙසන්ති, සුඛං අජ්ඣොසාය තිට්ඨන්ති,

අනු. පා: නො ච වත රෙ වත්තබ්බෙ: අත්ථි අසාතරාගො’ති.

2. ස. පු: අත්ථි අසාතරාගො’ති.

ප. පටිඤ්ඤා: ආමන්තා.

ස. අනු: දුක්ඛාය වෙදනාය රාගානුසයො අනුසෙති, සුඛාය වෙදනාය පටිඝානුසයො අනුසෙතී’ති.

ප. පටි: න හෙවං වත්තබ්බෙ.

ස. අනු: නනු සුඛාය වෙදනාය රාගානුසයො අනුසෙති, දුක්ඛාය වෙදනාය පටිඝානුසයො අනුසෙතී’ති.

ප. පටිඤ්ඤා: ආමන්තා.

අනු. ඨ: හඤ්චි සුඛාය වෙදනාය රාගානුසයො අනුසෙති, දුක්ඛාය වෙදනාය පටිඝානුසයො අනුසෙති,

අනු. පා: නො ච වත රෙ වත්තබ්බෙ “අත්ථි අසාතරාගො”ති.

3. ප. පු: න වත්තබ්බං “අත්ථි අසාතරාගො”ති.

ස. පටිඤ්ඤා: ආමන්තා.

ප. අනු: නනු වුත්තං භගවතා “සො එවං අනුරොධවිරොධං සමාපන්නො යං කිඤ්චි වෙදනං වෙදියති. සුඛං වා දුක්ඛං වා අදුක්ඛමසුඛං වා, සො තං වෙදනං අභිනන්දති අභිවදති අජ්ඣොසාය තිට්ඨතී”ති අත්ථෙව සුත්තන්තො’ති.

ස. පටිඤ්ඤා: ආමන්තා.

ප. ආ: තෙන හි ‘අත්ථි අසාතරාගො’ති.