1. ස. පු: සම්මුඛීභූතො සඤ්ඤොජනං ජහතී’ති.

ප. පටිඤ්ඤා: ආමන්තා.

ස. අනු: රත්තො රාගං ජහති, දුට්ඨො දොසං ජහති, මූළ්හො මොහං ජහති, කිලිට්ඨො කිලෙසෙ ජහතී’ති.

ප. පටි: න හෙවං වත්තබ්බෙ -පෙ-

ස. අනු: රාගෙන රාගං ජහති, දොසෙන දොසං ජහති, මොහෙන මොහං ජහති, කිලෙසෙහි කිලෙසෙ ජහතී’ති.

ප. පටි: න හෙවං වත්තබ්බෙ -පෙ-

2. ස. පු: රාගො චිත්තසම්පයුත්තො, මග්ගො චිත්තසම්පයුත්තො’ති.

ප. පටිඤ්ඤා: ආමන්තා.

ස. අනු: ද්වින්නං ඵස්සානං -පෙ- ද්වින්නං චිත්තානං සමොධානං හොතී’ති.

ප. පටි: න හෙවං වත්තබ්බෙ -පෙ-

3. ස. පු: රාගො අකුසලො, මග්ගො කුසලො’ති.

ප. පටිඤ්ඤා: ආමන්තා.

ස. අනු: කුසලාකුසලා සාවජ්ජානවජ්ජා හීනප්පණීතා කණ්හසුක්කසප්පටිභාගා ධම්මා සම්මුඛීභාවං ආගච්ඡන්තී’ති.

ප. පටි: න හෙවං වත්තබ්බෙ -පෙ-

4. ස. පු: කුසලාකුසලා -පෙ- සම්මුඛීභාවං ආගච්ඡන්තී’ති.

ප. පටිඤ්ඤා: ආමන්තා.

ස. අනු: නනු වුත්තං භගවතා “චත්තාරිමානි භික්ඛවෙ සුවිදූරවිදූරානි. කතමානි චත්තාරි: නභඤ්ච භික්ඛවෙ පඨවී ච, ඉදං පඨමං සුවිදූරවිදූරං -පෙ- තස්මා සතං ධම්මො අසබ්භි ආරකා”ති. අත්ථෙව සුත්තන්තො’ති.

ප. පටිඤ්ඤා: ආමන්තා.

ස. ආ: තෙන හි වත්තබ්බං “කුසලාකුසලා -පෙ- සම්මුඛීභාවං ආගච්ඡන්තී”ති.

5. ස. පු: සම්මුඛීභූතො සඤ්ඤොජනං ජහතී’ති.

ප. පටිඤ්ඤා: ආමන්තා.

ස. අනු: නනු වුත්තං භගවතා “සො එවං සමාහිතෙ චිත්තෙ පරිසුද්ධෙ -පෙ- ආසවානං ඛයඤාණාය චිත්තං අභිනින්නාමෙතී”ති. අත්ථෙව සුත්තන්තො’ති.

ප. පටි: ආමන්තා.

ස. ආ: තෙන හි න වත්තබ්බං “සම්මූඛීභුතො සඤ්ඤොජනං ජහතී’ති.

6. ප. පු: න වත්තබ්බං “සම්මුඛීභූතො සඤ්ඤොජනං ජහතී”ති.

ස. පටිඤ්ඤා: ආමන්තා.

ස. අනු: නනු වුත්තං භගවතා: තස්ස එවං ජානතො එවං පස්සතො කාමාසවා’පි චිත්තං විමුච්චති -පෙ- අවිජ්ජාසවා’පි චිත්තං විමුච්චතී”ති. අත්ථෙ’ව සුත්තන්තො’ති.

ස. පටි: ආමන්තා.

ප. ආ: තෙන හි සම්මුඛීභූතො සඤ්ඤොජනං ජහතී”ති.