අට්ඨහි භික්ඛවෙ ආකාරෙහි පුරිසො ඉත්ථිං බන්ධති, කතමෙහි අට්ඨහි:

රූපෙන භික්ඛවෙ පුරිසො ඉත්ථිං බන්ධති, හසිතෙන භික්ඛවෙ පුරිසො ඉත්ථිං බන්ධති. භණිතෙන භික්ඛවෙ පුරිසො ඉත්ථිං බන්ධති. ගීතෙන භික්ඛවෙ පුරිසො ඉත්ථිං බන්ධති. රුණ්ණෙන භික්ඛවෙ පුරිසො ඉත්ථිං බන්ධති. ආකප්පෙන භික්ඛවෙ පුරිසො ඉත්ථිං බන්ධති. වනභඞ්ගෙන භික්ඛවෙ, පුරිසො ඉත්ථිං බන්ධති. ඵස්සෙන භික්ඛවෙ පුරිසො ඉත්ථිං බන්ධති. ඉමෙහි ඛො භික්ඛවෙ අට්ඨහි ආකාරෙහි පුරිසො ඉත්ථිං බන්ධති, තෙ භික්ඛවෙ සත්තා සුබද්ධා යෙ ඵස්සෙන බද්ධාති.

එකං සමයං භගවා වෙරඤ්ජායං විහරති නළෙරු පුචිමන්ද මූලෙ. අථ ඛො පහාරාදො අසුරින්දො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතං ඛො පහාරාදං අසුරින්දං භගවා එතදවොච: අපි පන පහාරාද, අසුරා මහාසමුද්දෙ අභිරමන්තීති.

අභිරමන්ති භන්තෙ, අසුරා මහාසමුද්දෙති:

කති පන පහාරාද, මහාසමුද්දෙ අච්ඡරියා අබ්භුතා ධම්මා යෙ දිස්වා දිස්වා අසුරා මහාසමුද්දෙ අභිරමන්තීති.

අට්ඨ භන්තෙ, මහාසමුද්දෙ අච්ඡරියා අබ්භුතා ධම්මා යෙ දිස්වා දිස්වා අසුරා මහාසමුද්දෙ අභිරමන්ති කතමෙ අට්ඨ?:

1. මහාසමුද්දො භන්තෙ, අනුපුබ්බනින්නො අනුපුබ්බපොණො අනුපුබ්බපබ්භාරො න ආයතකෙනෙව පපාතො. යම්පි භන්තෙ, මහාසමුද්දො අනුපුබ්බනින්නො අනුපුබ්බපොණො අනුපුබ්බපබ්භාරො න ආයතකෙනෙව පපාතො, අයං භන්තෙ, මහාසමුද්දෙ පඨමො අච්ඡරියො අබ්භුතො ධම්මො යං දිස්වා දිස්වා අසුරා මහාසමුද්දෙ අභිරමන්ති.

2. පුන චපරං භන්තෙ, මහාසමුද්දො ඨිතධම්මො වෙලං නාතිවත්තති. යම්පි භන්තෙ, මහා සමුද්දො ඨිතධම්මො වෙලං නාතිවත්තති, අයං භන්තෙ, මහාසමුද්දෙ දුතියො අච්ඡරියො අබ්භුතො ධම්මො යං දිස්වා දිස්වා අසුරා මහාසමුද්දෙ අභිරමන්ති.

3. පුන චපරං භන්තෙ, මහාසමුද්දො න මතෙන කුණපෙන සංවසති, යං හොති මහාසමුද්දෙ මතං කුණපං තං ඛිප්පංයෙව තීරං වාහෙති, ථලං උස්සාදෙති යම්පි භන්තෙ, මහාසමුද්දො න මතෙන කුණපෙන සංවසති. යං හොති මහාසමුද්දෙ මතං කුණපං තං ඛිප්පං යෙව තීරං වාහෙති, ථලං උස්සාදෙති2. අයං භන්තෙ, මහාසමුද්දෙ තතියො අච්ඡරියො අබ්භුතො ධම්මො යං දිස්වා දිස්වා අසුරා මහාසමුද්දෙ අභිරමන්ති.