38. අථ ඛො අඤ්ඤතරො බ්රාහ්මණො යෙන භගවා තෙනුපසඞ්කමි. උපසඞ්කමිත්වා භගවතා සද්ධිං සම්මොදි. සම්මොදනීයං කථං සාරාණීයං වීතිසාරෙත්වා එකමන්තං නිසීදි. එකමන්තං නිසින්නො ඛො සො බ්රාහ්මණො භගවන්තං එතදවොච:

“අහං හි භො ගොතම එවංවාදී එවංදිට්ඨී: “නත්ථි අත්තකාරො, නත්ථි පරකාරොති.”

මාහං බ්රාහ්මණ, එවංවාදිං එවංදිට්ඨිං අද්දසං වා අස්සොසිං වා. කථං හි නාම සයං අභික්කමන්තො සයං පටික්කමන්තො එවං වක්ඛති: “නත්ථි අත්තකාරො, නත්ථි පරකාරො”ති.

තං කිං මඤ්ඤසි බ්රාහ්මණ, අත්ථි ආරම්භධාතූති?

එවම්භො

ආරම්භධාතුයා සති ආරම්භවන්තො සත්තා පඤ්ඤායන්තී?ති.

එවං භො.

යං ඛො බ්රාහ්මණ ආරම්භධාතුයා සති ආරම්භවන්තො සත්තා පඤ්ඤායන්තී’ති අයං සත්තානං අත්තකාරො, අයං පරකාරොති.

තං කිං මඤ්ඤසි බ්රාහ්මණ අත්ථි නික්ඛමධාතු -පෙ- අත්ථි පරක්කමධාතු -පෙ- අත්ථි ථාමධාතු -පෙ- අත්ථි ඨිතිධාතු -පෙ- අත්ථි උපක්කමධාතූ?ති.

එවම්භො.

උපක්කමධාතුයා සති උපක්කමවන්තො සත්තා පඤ්ඤායන්තී?ති.

එවං භො.

යං ඛො බ්රාහ්මණ, උපක්කමධාතුයා සති උපක්කමවන්තො සත්තා පඤ්ඤායන්තී’ති අයං සත්තානං අත්තකාරො, අයං පරකාරො’ති.

මාහං බ්රාහ්මණ, එවංවාදිං එවංදිට්ඨිං අද්දසං වා අස්සොසිං වා. කථං හි නාම සයං අභික්කමන්තො පටික්කමන්තො එවං වක්ඛති: “නත්ථි අත්තකාරො, නත්ථි පරකාරො”ති.

අභික්කන්තං භො ගොතම -පෙ- අජ්ජතග්ගෙ පාණුපෙතං සරණං ගතන්ති.

39. තීණිමානි භික්ඛවෙ නිදානානි කම්මානං සමුදයාය.

කතමානි තීණි:

ලොභො නිදානං කම්මානං සමුදයාය. දොසො නිදානං කම්මානං සමුදයාය. මොහො නිදානං කම්මානං සමුදයාය.

න භික්ඛවෙ ලොභා අලොභො සමුදෙති. අථ ඛො භික්ඛවෙ ලොභා ලොභොව සමුදෙති. න භික්ඛවෙ දොසා අදොසො සමුදෙති. අථ ඛො භික්ඛවෙ දොසා දොසොව සමුදෙති. න භික්ඛවෙ මොහා අමොහො සමුදෙති. අථ ඛො භික්ඛවෙ මොහා මොහොව සමුදෙති.

න භික්ඛවෙ ලොභජෙන කම්මෙන දොසජෙන කම්මෙන මොහජෙන කම්මෙන දෙවා පඤ්ඤායන්ති, න මනුස්සා පඤ්ඤායන්ති, යා වා පනඤ්ඤාපි කාචි සුගතියො.

අථ ඛො භික්ඛවෙ ලොභජෙන කම්මෙන දොසජෙන කම්මෙන මොහජෙන කම්මෙන නිරයො පඤ්ඤායති, තිරච්ඡානයොනි පඤ්ඤායති, පෙත්තිවිසයො පඤ්ඤායති, යා වා පනඤ්ඤාපි කාචි දුග්ගතියො.

ඉමානි ඛො භික්ඛවෙ තීණි නිදානානි කම්මානං සමුදයායාති.