18. පඤ්චිමෙ භික්ඛවෙ ආදීනවා අපාසාදිකෙ. කතමෙ පඤ්ච:

අප්පසන්නා නප්පසීදන්ති, පසන්නානඤ්ච එකච්චානං අඤ්ඤථත්තං හොති, සත්ථුසාසනං අකතං හොති, පච්ඡිමා ජනතා දිට්ඨානුගතිං ආපජ්ජති, චිත්තමස්ස නප්පසීදති.

ඉමෙ ඛො භික්ඛවෙ පඤ්ච ආදීනවා අපාසාදිකෙ.

පඤ්චිමෙ භික්ඛවෙ ආනිසංසා පාසාදිකෙ. කතමෙ පඤ්ච:

අප්පසන්නා පසීදන්ති, පසන්නානඤ්ච භිය්යො භාවො හොති, සත්ථු සාසනං කතං හොති, පච්ඡිමා ජනතා දිට්ඨානුගතිං ආපජ්ජති, චිත්තමස්ස පසීදති.

ඉමෙ ඛො භික්ඛවෙ පඤ්ච ආනිසංසා පාසාදිකෙති.

19. පඤ්චිමෙ භික්ඛවෙ ආදීනවා අග්ගිස්මිං. කතමෙ පඤ්ච:

අචක්ඛුස්සො, දුබ්බණ්ණකරණො, දුබ්බලකරණො, සඞ්ගණිකාපවද්ධනො, තිරච්ඡානකථාපවත්තනිකො.

ඉමෙ භික්ඛවෙ පඤ්ච: ආදීනවා අග්ගිස්මින්ති.

20. පඤ්චිමෙ භික්ඛවෙ ආදීනවා මධුරායං. කතමෙ පඤ්ච:

විසමා, බහුරජා, චණ්ඩසුනඛා, වාළයක්ඛා, දුල්ලභපිණ්ඩා.

ඉමෙ ඛො භික්ඛවෙ පඤ්ච ආදීනවා මධුරායන්ති.