19. පඤ්චිමෙ භික්ඛවෙ ආදීනවා අග්ගිස්මිං. කතමෙ පඤ්ච:

අචක්ඛුස්සො, දුබ්බණ්ණකරණො, දුබ්බලකරණො, සඞ්ගණිකාපවද්ධනො, තිරච්ඡානකථාපවත්තනිකො.

ඉමෙ භික්ඛවෙ පඤ්ච: ආදීනවා අග්ගිස්මින්ති.

20. පඤ්චිමෙ භික්ඛවෙ ආදීනවා මධුරායං. කතමෙ පඤ්ච:

විසමා, බහුරජා, චණ්ඩසුනඛා, වාළයක්ඛා, දුල්ලභපිණ්ඩා.

ඉමෙ ඛො භික්ඛවෙ පඤ්ච ආදීනවා මධුරායන්ති.

21. පඤ්චිමෙ භික්ඛවෙ ආදීනවා දීඝචාරිකං අනවත්ථ චාරිකං අනුයුත්තස්ස විහරතො. කතමෙ පඤ්ච:

අස්සුතං න සුණාති, සුතං න පරියොදපෙති, සුතෙනෙකච්චෙන අවිසාරදො හොති, බාළ්හං රොගාතඞ්කං ඵුසති, න ච මිත්තවා හොති.

ඉමෙ ඛො භික්ඛවෙ පඤ්ච ආදීනවා දීඝචාරිකං අනවත්ථ චාරිකං අනුයුත්තස්ස විහරතො.

පඤ්චිමෙ භික්ඛවෙ ආනිසංසා සමවත්ථචාරෙ. කතමෙ පඤ්ච:

අස්සුතං සුණාති, සුතං පරියොදපෙති, සුතෙනෙකච්චෙන විසාරදො හොති, න බාළ්හං රොගාතඞ්කං ඵුසති, මිත්තවා ච හොති.

ඉමෙ ඛො භික්ඛවෙ පඤ්ච ආනිසංසා සමවත්ථචාරෙති.

22. පඤ්චිමෙ භික්ඛවෙ ආදීනවා දීඝචාරිකං අනවත්ථ චාරිකං අනුයුත්තස්ස විහරතො. කතමෙ පඤ්ච:

අනධිගතං නාධිගච්ඡති අධිගතං පරිහායති, අධිගතෙනෙකච්චෙන අවිසාරදො හොති බාළ්හං රොගාතඞ්කං ඵුසති, න ච මිත්තවා හොති.

ඉමෙ ඛො භික්ඛවෙ පඤ්ච ආදීනවා දීඝචාරිකං අනවත්ථ චාරිකං අනුයුත්තස්ස විහරතො.

පඤ්චිමෙ භික්ඛවෙ ආනිසංසා සමවත්ථචාරෙ. කතමෙ පඤ්ච:

අනධිගතං අධිගච්ඡති, අධිගතං න පරිහායති, අධිගතෙනෙකච්චෙන විසාරදො හොති, න බාළ්හං රොගාතඞ්කං ඵුසති, මිත්තවා ච හොති.

ඉමෙ ඛො භික්ඛවෙ පඤ්ච ආනිසංසා සමවත්ථචාරෙති.