7. ද්වෙමෙ භික්ඛවෙ අසනියා ඵලන්තියා න සන්තසන්ති. කතමෙ ද්වෙ: භික්ඛු ච ඛීණාසවො, අස්සාජානීයො ච. ඉමෙ ඛො භික්ඛවෙ ද්වෙ අසනියා ඵලන්තියා න සන්තසන්තීති.

8. ද්වෙමෙ භික්ඛවෙ අසනියා ඵලන්තියා න සන්තසන්ති. කතමෙ ද්වෙ: භික්ඛු ච ඛීණාසවො, සීහො ච මිගරාජා. ඉමෙ ඛො භික්ඛවෙ ද්වෙ අසනියා ඵලන්තියා න සන්තසන්තීති.

9. ද්වෙමෙ භික්ඛවෙ අත්ථවසෙ සම්පස්සමානා කිම්පුරිසා මානුසිං වාචං න භාසන්ති. කතමෙ ද්වෙ: මා ච මුසා භණිම්හා, මා ච පරං අභූතෙන අබ්භාචික්ඛිම්හාති. ඉමෙ ඛො භික්ඛවෙ ද්වෙ අත්ථවසෙ සම්පස්සමානා කිම්පුරිසා මානුසිං වාචං න භාසන්තීති.

10. ද්වින්නං භික්ඛවෙ ධම්මානං අතිත්තො අප්පටිවානො මාතුගාමො කාලං කරොති. කතමෙසං ද්වින්නං: මෙථුනධම්මසමාපත්තියා ච, විජායනස්ස ච. ඉමෙසං ඛො භික්ඛවෙ ද්වින්නං ධම්මානං අතිත්තො අප්පටිවානො මාතුගාමො කාලං කරොතීති.

11. අසන්තසන්නිවාසංච වො භික්ඛවෙ දෙසිස්සාමි සන්තසන්නිවාසඤ්ච. තං සුණාථ, සාධුකං මනසි කරොථ, භාසිස්සාමීති: එවං භන්තෙති ඛො තෙ භික්ඛූ භගවතො පච්චස්සොසුං. භගවා එතදවොච.

කථඤ්ච භික්ඛවෙ අසන්තසන්නිවාසො හොති: කථඤ්ච අසන්තො සන්නිවසන්ති:

ඉධ භික්ඛවෙ ථෙරස්ස භික්ඛුනො එවං හොති : ථෙරොපි මං න වදෙය්ය, මජ්ඣිමොපි මං න වදෙය්ය, නවොපි මං න වදෙය්ය, ථෙරම්පහං න වදෙය්යං. මජ්ඣිමම්පාහං න වදෙය්යං, නවම්පහං න වදෙය්යං. ථෙරො චෙපි මං වදෙය්ය, අහිතානුකම්පී මං වදෙය්ය, නො හිතානුකම්පී, නොති නං වදෙය්යං, විහෙසෙය්යම්පි නං, පස්සම්පිස්ස න පටිකරෙය්යං. මජ්ඣිමො චෙපි මං වදෙය්ය, නවො චෙපි මං වදෙය්ය, අහිතානුකම්පී මං වදෙය්ය; නො හිතානුකම්පී. නොති නං වදෙය්යං, විහෙසෙය්යම්පි නං, පස්සම්පිස්ස න පටිකරෙය්යං. මජ්ඣිමස්සපි භික්ඛුනො එවං හොති -පෙ- නවස්සපි භික්ඛුනො එවං හොති : ථෙරොපි මං න වදෙය්ය, මජ්ඣිමොපි මං න වදෙය්ය, නවොපි මං න වදෙය්ය, ථෙරම්පාහං න වදෙය්යං, මජ්ඣිමම්පහං න වදෙය්යං, නවම්පහං නං වදෙය්යං. ථෙරො චෙපි මං වදෙය්ය, අහිතානුකම්පී මං වදෙය්ය, නො හිතානුකම්පී, නොති නං වදෙය්යං, විහෙසෙය්යම්පි නං, පස්සම්පිස්ස න පටිකරෙය්යං. මජ්ඣිමො චෙපි මං වදෙය්ය, නවො චෙපි මං වදෙය්ය; අහිතානුකම්පී මං වදෙය්ය, නො හිතානුකම්පී, නොති නං වදෙය්යං, විහෙසෙය්යම්පි නං; පස්සම්පිස්ස න පටිකරෙය්යං. එවං ඛො භික්ඛවෙ අසන්තසන්නිවාසො හොති. එවං ච අසන්තො සන්නිවසන්ති.