සපරික්කමනො අයං භික්ඛවෙ ධම්මො, නායං ධම්මො අපරික්කමනො. කථඤ්ච භික්ඛවෙ සපරික්කමනො අයං ධම්මො, නායං ධම්මො අපරික්කමනො:

පාණාතිපාතිස්ස භික්ඛවෙ පාණාතිපාතා වෙරමණී පරික්කමනං හොති. අදින්නාදානස්ස භික්ඛවෙ අදින්නාදානා වෙරමණී පරික්කමනං හොති. කාමෙසු මිච්ඡාචාරිස්ස භික්ඛවෙ කාමෙසු මිච්ඡාචාරා වෙරමණී පරික්කමනං හොති. මුසාවාදිස්ස භික්ඛවෙ මුසාවාදා වෙරමණී පරික්කමනං හොති.

පිසුනාවාචස්ස භික්ඛවෙ පිසුනාවාචා වෙරමණී පරික්කමනං හොති. ඵරුසාවාචස්ස භික්ඛවෙ ඵරුසාය වාචාය වෙරමණී පරික්කමනං හොති. සම්ඵප්පලාපිස්ස භික්ඛවෙ සම්ඵප්පලාපා වෙරමණී පරික්කමනං හොති. අභිජ්ඣාලුස්ස භික්ඛවෙ අනභිජ්ඣා පරික්කමනං හොති. ව්යාපන්නස්ස භික්ඛවෙ අව්යාපාදො පරික්කමනං හොති. මිච්ඡාදිට්ඨිකස්ස භික්ඛවෙ සම්මාදිට්ඨි පරික්කමනං හොති.

එවං ඛො භික්ඛවෙ, සපරික්කමනො අයං ධම්මො නායං ධම්මො අපරික්කමනොති.

එවං මෙ සුතං, එකං සමයං භගවා පාවායං විහරති චුන්දස්ස කම්මාර පුත්තස්ස අම්බවනෙ. අථ ඛො චුන්දො කම්මාරපුත්තො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො චුන්දං කම්මාරපුත්තං භගවා එතදවොච: කස්ස නො ත්වං චුන්ද සොචෙය්යානි රොචෙය්යාසීති?

බ්රාහ්මණා භන්තෙ පච්ඡාභූමකා කමණ්ඩලුකා සෙවාලමාලිකා අග්ගිපරිචාරකා උදකොරොහකා සොචෙය්යානි පඤ්ඤාපෙන්ති. තෙසාහං සොචෙය්යානි රොචෙමීති.

යථා කථං පන චුන්ද, බ්රාහ්මණා පච්ඡාභූමකා කමණ්ඩලුකා සෙවාලමාලිකා අග්ගිපරිචාරිකා උදකොරොහකා සොචෙය්යානි පඤ්ඤාපෙන්තීති?

ඉධ භන්තෙ බ්රාහ්මණා පච්ඡා භූමකා කමණ්ඩලුකා සෙවාලමාලිකා අග්ගිපරිචාරිකා උදකොරොහකා තෙ සාවකෙ එවං සමාදපෙන්ති: “එහි ත්වං අම්භො පුරිස, කාලස්සෙව උට්ඨහන්තොව සයනම්හා පඨවිං ආමසෙය්යාසි, නො චෙ පඨවිං ආමසෙය්යාසි අල්ලානි ගොමයානි ආමසෙය්යාසි, නො චෙ අල්ලානි ගොමයානි ආමසෙය්යාසි හරිතානි තිණානි ආමසෙය්යාසි.