එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො ආයස්මා ආනන්දො යෙන භගවා තෙනුපසංකමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො ආයස්මා ආනන්දො භගවන්තං එතදවොච:

කිමත්ථියානි භන්තෙ කුසලානි සීලානි, කිමානිසංසානීති?

අවිප්පටිසාරත්ථානි ඛො ආනන්ද කුසලානි සීලානි, අවිප්පටිසාරානිසංසානීති.

අවිප්පටිසාරො පන භන්තෙ කිමත්ථියො, කිමානිසංසොති?

අවිප්පටිසාරො ඛො ආනන්ද පාමොජ්ජත්ථො, පාමොජ්ජානිසංසොති.

පාමොජ්ජං පන භන්තෙ කිමත්ථියං, කිමානිසංසන්ති?

පාමොජ්ජං ඛො ආනන්ද පීතත්ථං, පීතානිසංසන්ති.

පීති පන භන්තෙ කිමත්ථියා, කිමානිසංසාති?

පීති ඛො ආනන්ද පස්සද්ධත්ථා, පස්සද්ධානිසංසාති.

පස්සද්ධි පන භන්තෙ කිමත්ථියා, කිමානිසංසාති?

පස්සද්ධි ඛො ආනන්ද සුඛත්ථා, සුඛානිසංසාති.

සුඛං පන භන්තෙ කිමත්ථියං, කිමානිසංසන්ති?

සුඛං ඛො ආනන්ද සමාධත්ථං, සමාධානිසංසන්ති.

සමාධි පන භන්තෙ කිමත්ථියො, කිමානිසංසොති?

සමාධි ඛො ආනන්ද යථාභූතඤාණදස්සනත්ථො, යථාභූතඤාණදස්සනානිසංසොති.

යථාභූතඤාණදස්සනං පන භන්තෙ කිමත්ථියං, කිමානිසංසන්ති?

යථාභූතඤාණදස්සනං ඛො ආනන්ද නිබ්බිදාවිරාගත්ථං, නිබ්බිදාවිරාගානිසංසන්ති. .

නිබ්බිදාවිරාගො පන භන්තෙ කිමත්ථියො, කිමානිසංසොති?

නිබ්බිදාවිරාගො ඛො ආනන්ද විමුත්තිඤාණදස්සනත්ථො, විමුත්තිඤාණදස්සනානිසංසොති.

ඉති ඛො ආනන්ද කුසලානි සීලානි අවිප්පටිසාරත්ථානි අවිප්පටිසාරානිසංසානි. අවිප්පටිසාරො පාමොජ්ජත්ථො, පාමොජ්ජානිසංසො. පාමොජ්ජං පීතත්ථං පීතානිසංසං. පීති පස්සද්ධත්ථා, පස්සද්ධානිසංසා. පස්සද්ධි සුඛත්ථා සුඛානිසංසා. සුඛං සමාධත්ථං සමාධානිසංසං. සමාධි යථාභූතඤාණදස්සනත්ථො යථාභූතඤාණදස්සනානිසංසො. යථාභූතඤාණදස්සනං නිබ්බිදාවිරාගානිසංසං. නිබ්බිදාවිරාගො විමුත්තිඤාණදස්සනත්ථො විමුත්තිඤාණදස්සනානිසංසො. ඉති ඛො ආනන්ද කුසලානි සීලානි අනුපුබ්බෙන අග්ගාය පරෙන්තීති.