එකං සමයං භගවා වෙසාලියං විහරති මහාවනෙ කූටාගාරසාලායං අථ ඛො මහාලි ලිච්ඡවී යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො මහාලි ලිච්ඡවි භගවන්තං එතදවොච:

“කො නු ඛො භන්තෙ හෙතු, කො පච්චයො, පාපස්ස කම්මස්ස කිරියාය, පාපස්ස කම්මස්ස පවත්තියාති?”

ලොභො ඛො මහාලි හෙතු, ලොභො පච්චයො පාපස්ස කම්මස්ස කිරියාය, පාපස්ස කම්මස්ස පවත්තියා. දොසො ඛො මහාලි හෙතු, දොසො පච්චයො, පාපස්ස කම්මස්ස කිරියාය, පාපස්ස කම්මස්ස පවත්තියා, මොහො ඛො මහාලි හෙතු, මොහො පච්චයො පාපස්ස කම්මස්ස කිරියාය, පාපස්ස කම්මස්ස පවත්තියා. අයොනිසො මනසිකාරො ඛො මහාලි හෙතු, අයොනිසො මනසිකාරො පච්චයො පාපස්ස කම්මස්ස කිරියාය, පාපස්ස කම්මස්ස පවත්තියා, මිච්ඡා පණිහිතං ඛො මහාලි චිත්තං හෙතු, මිච්ඡා පණිහිතං චිත්තං පච්චයො පාපස්ස කම්මස්ස කිරියාය පාපස්ස කම්මස්ස පවත්තියා, අයං ඛො මහාලි හෙතු, අයං පච්චයො පාපස්ස කම්මස්ස කිරියාය, පාපස්ස කම්මස්ස පවත්තියා ති.

කො පන භන්තෙ හෙතු, කො පච්චයො කල්යාණස්ස කම්මස්ස කිරියාය, කල්යාණස්ස කම්මස්ස පවත්තියාති?

අලොභො ඛො මහාලි හෙතු, අලොභො පච්චයො කල්යාණස්ස කම්මස්ස කිරියාය, කල්යාණස්ස කම්මස්ස පවත්තියා, අදොසො ඛො මහාලි -පෙ- අමොහො ඛො මහාලි හෙතු, අමොහො පච්චයො කල්යාණස්ස කම්මස්ස කිරියාය, කල්යාණස්ස කම්මස්ස පවත්තියා. යොනිසො මනසිකාරො ඛො මහාලි හෙතු, යොනිසො මනසිකාරො පච්චයො කල්යාණස්ස කම්මස්ස කිරියාය, කල්යාණස්ස කම්මස්ස පවත්තියා. සම්මාපණිහිතං ඛො මහාලි චිත්තං හෙතු, සම්මාපණිහිතං චිත්තං පච්චයො, කල්යාණස්ස කම්මස්ස කිරියාය, කල්යාණස්ස කම්මස්ස පවත්තියා. අයං ඛො මහාලි හෙතු අයං පච්චයො, කල්යාණස්ස කම්මස්ස කිරියාය, කල්යාණස්ස කම්මස්ස පවත්තියා.

ඉමෙ ච ඛො මහාලි දස ධම්මා ලොකෙ න සංවිජ්ජෙය්යුං, නයිදං පඤ්ඤායෙථ අධම්මචරියා විසමචරියාති වා, ධම්මචරියා සමචරියාති වා, යස්මා ච ඛො මහාලි ඉමෙ දස ධම්මා ලොකෙ සංවිජ්ජන්ති, තස්මා පඤ්ඤායති අධම්මචරියා විසමචරියාති වා ධම්මචරියා සමචරියාති වාති.

දස ඉමෙ භික්ඛවෙ ධම්මා පබ්බජිතෙන අභිණ්හං පච්චවෙක්ඛිතබ්බා. කතමෙ දස:

1. “වෙවණ්ණියම්හි අජ්ඣුපගතො”ති පබ්බජිතෙන අභිණ්හං පච්චවෙක්ඛිතබ්බං,

2. “පරපටිබද්ධා මෙ ජීවිකා”ති පබ්බජිතෙන අභිණ්හං පච්චවෙක්ඛිතබ්බං.

3. “අඤ්ඤො මෙ ආකප්පො කරණීයො”ති පබ්බජිතෙන අභිණ්හං පච්චවෙක්ඛිතබ්බං.