කති සමථා විවාදාධිකරණස්ස තබ්භාගියා, කති සමථා විවාදාධිකරණස්ස අඤ්ඤභාගියා. කති සමථා අනුවාදාධිකරණස්ස තබ්භාගියා, කති සමථා අනුවාදාධිකරණස්ස අඤ්ඤභාගියා. කති සමථා ආපත්තාධිකරණස්ස තබ්භාගියා, කති සමථා ආපත්තාධිකරණස්ස අඤ්ඤභාගියා. කති සමථා කිච්චාධිකරණස්ස තබ්භාගියා, කති සමථා කිච්චාධිකරණස්ස අඤ්ඤභාගියා :

1. ද්වෙ සමථා විවාදාධිකරණස්ස තබ්භාගියා : සම්මුඛාවිනයො, යෙභුය්යසිකා. පඤ්ච සමථා විවාදාධිකරණස්ස අඤ්ඤභාගියා : සතිවිනයො, අමූළ්හවිනයො, පටිඤ්ඤාතකරණං, තස්සපාපිය්යසිකා, තිණවත්ථාරකො.

2. චත්තාරො සමථා අනුවාදාධිකරණස්ස තබ්භාගියා : සම්මුඛාවිනයො, සතිවිනයො, අමූළ්හවිනයො, තස්සපාපිය්යසිකා. තයො සමථා අනුවාදාධිකරණස්ස අඤ්ඤභාගියා : යෙභුය්යසිකා, පටිඤ්ඤාතකරණං, තිණවත්ථාරකො.

3. තයො සමථා ආපත්තාධිකරණස්ස තබ්භාගියා : සම්මුඛාවිනයො, පටිඤ්ඤාතකරණං, තිණවත්ථාරකො. චත්තාරො සමථා ආපත්තාධිකරණස්ස අඤ්ඤභාගියා : යෙභුය්යසිකා, සතිවිනයො, අමූළ්හවිනයො, තස්සපාපිය්යසිකා.

4. එකො සමථො කිච්චාධිකරණස්ස තබ්භාගියො : සම්මුඛාවිනයො. ඡ සමථා කිච්චාධිකරණස්ස අඤ්ඤභාගියා : යෙභුය්යසිකා, සතිවිනයො, අමූළ්හවිනයො, පටිඤ්ඤාතකරණං, තස්සපාපිය්යසිකා, තිණවත්ථාරකො.

සමථා සමථස්ස සාධාරණා, සමථා සමථස්ස අසාධාරණා. සියා සමථා සමථස්ස සාධාරණා, සියා සමථා සමථස්ස අසාධාරණා.

කථං සියා සමථා සමථස්ස සාධාරණා, කථං සියා සමථා සමථස්ස අසාධාරණා :

1. යෙභුය්යසිකා සම්මුඛාවිනයස්ස සාධාරණා, සතිවිනයස්ස අමූළ්හවිනයස්ස පටිඤ්ඤාතකරණස්ස තස්සපාපිය්යසිකාය තිණවත්ථාරකස්ස අසාධාරණා.

2. සතිවිනයො සම්මුඛාවිනයස්ස සාධාරණො, අමූළ්හවිනයස්ස පටිඤ්ඤාතකරණස්ස තස්සපාපිය්යසිකාය තිණවත්ථාරකස්ස යෙභුය්යසිකාය අසාධාරණො.

3. අමූළ්හවිනයො සම්මුඛාවිනයස්ස සාධාරණො, පටිඤ්ඤාතකරණස්ස තස්සපාපිය්යසිකාය තිණවත්ථාරකස්ස යෙභුය්යසිකාය සතිවිනයස්ස අසාධාරණො.

4. පටිඤ්ඤාතකරණං සම්මුඛාවිනයස්ස සාධාරණං තස්සපාපිය්යසිකාය තිණවත්ථාරකස්ස යෙභුය්යසිකාය සතිවිනයස්ස අමූළ්හවිනයස්ස අසාධාරණං.

5. තස්සපාපිය්යසිකා සම්මුඛාවිනයස්ස සාධාරණා, තිණවත්ථාරකස්ස යෙභුය්යසිකාය සතිවිනයස්ස අමූළ්හවිනයස්ස පටිඤ්ඤාතකරණස්ස අසාධාරණා.

6. තිණවත්ථාරකො සම්මුඛාවිනයස්ස සාධාරණො, යෙභුය්යසිකාය සතිවිනයස්ස අමූළ්හවිනයස්ස පටිඤ්ඤාතකරණස්ස තස්සපාපිය්යසිකාය අසාධාරණො; එවං සියා සමථා සමථස්ස සාධාරණා එවං සියා සමථා සමථස්ස අසාධාරණා.