සමථා සමථෙහි සම්මන්ති. සමථා අධිකරණෙහි සම්මන්ති. අධිකරණා සමථෙහි සම්මන්ති අධිකරණා අධිකරණෙහි සම්මන්ති :

සියා සමථා සමථෙහි සම්මන්ති. සියා සමථා සමථෙහි න සම්මන්ති. සියා සමථා අධිකරණෙහි සම්මන්ති. සියා සමථා අධිකරණෙහි න සම්මන්ති. සියා අධිකරණා සමථෙහි සම්මන්ති. සියා අධිකරණා සමථෙහි න සම්මන්ති. සියා අධිකරණා අධිකරණෙහි සම්මන්ති. සියා අධිකරණා අධිකරණෙහි න සම්මන්ති.

කථං සියා සමථා සමථෙහි සම්මන්ති, කථං සියා සමථා සමථෙහි න සම්මන්ති :

යෙභුය්යසිකා සම්මුඛාවිනයෙන සම්මති. සතිවිනයෙන න සම්මති. අමූළ්හවිනයෙන න සම්මති. පටිඤ්ඤාතකරණෙන න සම්මති. තස්සපාපිය්යසිකාය න සම්මති. තිණවත්ථාරකෙන න සම්මති.

සතිවිනයො සම්මුඛාවිනයෙන සම්මති. අමූළ්හවිනයෙන න සම්මති. පටිඤ්ඤාතකරණෙන න සම්මති, තස්සපාපිය්යසිකාය න සම්මති. තිණවත්ථාරකෙන න සම්මති. යෙභුය්යසිකාය න සම්මති.

අමූළ්හවිනයො සම්මුඛාවිනයෙන සම්මති. පටිඤ්ඤාතකරණෙන න සම්මති. තස්සපාපිය්යසිකාය න සම්මති. තිණවත්ථාරකෙන න සම්මති. යෙභුය්යසිකාය න සම්මති. සතිවිනයෙන න සම්මති.

පටිඤ්ඤාතකරණං සම්මුඛාවිනයෙන සම්මති. තස්සපාපිය්යසිකාය න සම්මති. තිණවත්ථාරකෙන න සම්මති. යෙභුය්යසිකාය න සම්මති. සතිවිනයෙන න සම්මති. අමූළ්හවිනයෙන න සම්මති.

තස්සපාපිය්යසිකා සම්මුඛාවිනයෙන සම්මති. තිණවත්ථාරකෙන න සම්මති. යෙභුය්යසිකාය න සම්මති. සතිවිනයෙන න සම්මති. අමූළ්හවිනයෙන න සම්මති. පටිඤ්ඤාතකරණෙන න සම්මති.

තිණවත්ථාරකො සම්මුඛාවිනයෙන සම්මති. යෙභුය්යසිකාය න සම්මති. සතිවිනයෙන න සම්මති. අමූළ්හවිනයෙන න සම්මති. පටිඤ්ඤාතකරණෙන න සම්මති. තස්සපාපිය්යසිකාය න සම්මති.

එවං සියා සමථා සමථෙහි සම්මන්ති. එවං සියා සමථා සමථෙහි න සම්මන්ති.

කථං සියා සමථා අධිකරණෙහි සම්මන්ති, කථං සියා සමථා අධිකරණෙහි න සම්මන්ති,

සම්මුඛාවිනයො විවාදාධිකරණෙන න සම්මන්ති, අනුවාදාධිකරණෙන න සම්මති, ආපත්තාධිකරණෙන න සම්මති. කිච්චාධිකරණෙන සම්මති.

යෙභුය්යසිකා විවාදාධිකරණෙන න සම්මති, අනුවාදාධිකරණෙන න සම්මති, ආපත්තාධිකරණෙන න සම්මති කිච්චාධිකරණෙන සම්මති.

සතිවිනයො විවාදාධිකරණෙන න සම්මති, අනුවාදාධිකරණෙන න සම්මති. ආපත්තාධිකරණෙන න සම්මති. කිච්චාධිකරණෙන සම්මති.

අමූළ්හවිනයො විවාදාධිකරණෙන න සම්මති. අනුවාදාධිකරණෙන න සම්මති. ආපත්තාධිකරණෙන න සම්මති. කිච්චාධිකරණෙන සම්මති.

පටිඤ්ඤාතකරණං විවාදාධිකරණෙන න සම්මති. අනුවාදාධිකරණෙන න සම්මති. ආපත්තාධිකරණෙන න සම්මති. කිච්චාධිකරණෙන සම්මති.

තස්සපාපිය්යසිකා විවාදාධිකරණෙන න සම්මති. අනුවාදාධිකරණෙන න සම්මති ආපත්තාධිකරණෙන න සම්මති. කිච්චාධිකරණෙන සම්මති.

තිණවත්ථාරකො විවාදාධිකරණෙන න සම්මති. අනුවාදාධිකරණෙන න සම්මති. ආපත්තාධිකරණෙන න සම්මති. කිච්චාධිකරණෙන සම්මති.

එවං සියා සමථා අධිකරණෙහි සම්මන්ති. එවං සියා සමථා අධිකරණෙහි න සම්මන්ති.

කථං සියා අධිකරණා සමථෙහි සම්මන්ති, කථං සියා අධිකරණා සමථෙහි න සම්මන්ති.

විවාදාධිකරණං සම්මුඛාවිනයෙන ච යෙභුය්යසිකාය ච සම්මති. සතිවිනයෙන ච අමූළ්හවිනයෙන ච පටිඤ්ඤාතකරණෙන ච තස්සපාපිය්යසිකාය ච තිණවත්ථාරකෙන ච න සම්මති.