සම්මුඛාවිනයො කුසලො අකුසලො අබ්යාකතො, යෙභුය්යසිකා කුසලා අකුසලා අබ්යාකතා. සතිවිනයො කුසලො අකුසලො අබ්යාකතො. අමූළ්හවිනයො කුසලො අකුසලො අබ්යාකතො, පටිඤ්ඤාතකරණං කුසලං අකුසලං අබ්යාකතං, තස්සපාපිය්යසිකා කුසලා අකුසලා අබ්යාකතා. තිණවත්ථාරකො කුසලො අකුසලො අබ්යාකතො.

1. සම්මුඛාවිනයො සියා කුසලො සියා අබ්යාකතො. නත්ථි සම්මුඛා විනයො අකුසලො.

2. යෙභුය්යසිකා සියා කුසලා. සියා අකුසලා. සියා අබ්යාකතා.

3. සතිවිනයො සියා කුසලො. සියා අකුසලො. සියා අබ්යාකතො.

4. අමූළ්හවිනයො සියා කුසලො. සියා අකුසලො. සියා අබ්යාකතො.

5. පටිඤ්ඤාතකරණං සියා කුසලං. සියා අකුසලං. සියා අබ්යාකතං.

6. තස්සපාපිය්යසිකා සියා කුසලා. සියා අකුසලා. සියා අබ්යාකතා.

7. තිණවත්ථාරකො සියා කුසලො. සියා අකුසලො. සියා අබ්යාකතො.

විවාදාධිකරණං කුසලං අකුසලං අබ්යාකතං. අනුවාදාධිකරණං කුසලං අකුසලං අබ්යාකතං. ආපත්තාධිකරණං කුසලං අකුසලං අබ්යාකතං. කිච්චාධිකරණංකුසලං අකුසලං අබ්යාකතං :

1. විවාදාධිකරණං සියා කුසලං. සියා අකුසලං. සියා අබ්යාකතං.

2. අනුවාදාධිකරණං සියා කුසලං. සියා අකුසලං. සියා අබ්යාකතං.

3. ආපත්තාධිකරණං සියා අකුසලං. සියා අබ්යාකතං. නත්ථි ආපත්තාධිකරණං කුසලං.

4. කිච්චාධිකරණං සියා කුසලං. සියා අකුසලං. සියා අබ්යාකතං.

1. යත්ථ යෙභුය්යසිකා ලබ්භති, තත්ථ සම්මුඛාවිනයො ලබ්භති, යත්ථ සම්මුඛාවිනයො ලබ්භති, තත්ථ යෙභුය්යසිකා ලබ්භති. න තත්ථ සතිවිනයො ලබ්භති. න තත්ථ අමූළ්හවිනයො ලබ්භති. න තත්ථ පටිඤ්ඤාතකරණං ලබ්භති. න තත්ථ තස්සපාපිය්යසිකා ලබ්භති. න තත්ථ තිණවත්ථාරකො ලබ්භති.

2. යත්ථ සතිවිනයො ලබ්භති. තත්ථ සම්මුඛාවිනයො ලබ්භති. යත්ථ සම්මුඛාවිනයො ලබ්භති, තත්ථ සතිවිනයො ලබ්භති. න තත්ථ අමූළ්හවිනයො ලබ්භති. න තත්ථ පටිඤ්ඤාතකරණං ලබ්භති. න තත්ථ තස්සපාපිය්යසිකා ලබ්භති. න තත්ථ තිණවත්ථාරකො ලබ්භති. න තත්ථ යෙභුය්යසිකා ලබ්භති.

3. යත්ථ අමූළ්හවිනයො ලබ්භති, තත්ථ සම්මුඛාවිනයො ලබ්භති. යත්ථ සම්මුඛාවිනයො ලබ්භති, තත්ථ අමූළ්හවිනයො ලබ්භති. න තත්ථ පටිඤ්ඤාතකරණං ලබ්භති. න තත්ථ තස්සපාපිය්යසිකා ලබ්භති. න තත්ථ තිණවත්ථාරකො ලබ්භති. න තත්ථ යෙභුය්යසිකා ලබ්භති. න තත්ථ සතිවිනයො ලබ්භති.

4. යත්ථ පටිඤ්ඤාතකරණං ලබ්භති, තත්ථ සම්මුඛාවිනයො ලබ්භති, යත්ථ සම්මුඛාවිනයො ලබ්භති, තත්ථ පටිඤ්ඤාතකරණං ලබ්භති. න තත්ථ තස්සපාපිය්යසිකා ලබ්භති. න තත්ථ තිණවත්ථාරකො ලබ්භති. න තත්ථ යෙභුය්යසිකා ලබ්භති. න තත්ථ සතිවිනයො ලබ්භති. න තත්ථ අමූළ්හවිනයො ලබ්භති.

5. යත්ථ තස්සපාපිය්යසිකා ලබ්භති, තත්ථ සම්මුඛාවිනයො ලබ්භති, යත්ථ සම්මුඛාවිනයො ලබ්භති, තත්ථ තස්සපාපිය්යසිකා ලබ්භති. න තත්ථ තිණවත්ථාරකො ලබ්භති. න තත්ථ යෙභුය්යසිකා ලබ්භති. න තත්ථ සතිවිනයො ලබ්භති, න තත්ථ අමූළ්හවිනයො ලබ්භති, න තත්ථ පටිඤ්ඤාතකරණං ලබ්භති.

6. යත්ථ තිණවත්ථාරකො ලබ්භති, තත්ථ සම්මුඛාවිනයො ලබ්භති, යත්ථ සම්මුඛාවිනයො ලබ්භති, තත්ථ තිණවත්ථාරකො ලබ්භති. න තත්ථ යෙභුය්යසිකා ලබ්භති. න තත්ථ සතිවිනයො ලබ්භති. න තත්ථ අමූළ්හවිනයො ලබ්භති. න තත්ථ පටිඤ්ඤාතකරණං ලබ්භති. න තත්ථ තස්සපාපිය්යසිකා ලබ්භති.

7. යත්ථ යෙභුය්යසිකා තත්ථ සම්මුඛාවිනයො. යත්ථ සම්මුඛාවිනයො තත්ථ යෙභුය්යසිකා. න තත්ථ සතිවිනයො. න තත්ථ අමූළ්හවිනයො. න තත්ථ පටිඤ්ඤාතකරණං. න තත්ථ තස්සපාපිය්යසිකා. න තත්ථ තිණවත්ථාරකො.

8. යත්ථ සතිවිනයො තත්ථ සම්මුඛාවිනයො. යත්ථ සම්මුඛාවිනයො තත්ථ සතිවිනයො. න තත්ථ අමූළ්හවිනයො. න තත්ථ පටිඤ්ඤාතකරණං. න තත්ථ තස්සපාපිය්යසිකා. න තත්ථ තිණවත්ථාරකො. න තත්ථ යෙභුය්යසිකා. (සම්මුඛාවිනයං කාතුනමූලං-පෙ-.)