37. උබ්භතං කඨිනං තීණි පඨමං පත්තභෙසජ්ජං,
අච්චෙකං චාපි සාසඞ්කං පක්කමන්තෙන වා දුවෙ.

38. උපස්සයං පරම්පරං අනතිරිත්තං නිමන්තනා,
විකප්පං රඤ්ඤො විකාලෙ වොසාසාරඤ්ඤකෙන ච.

39. උස්සයා සන්නිචයඤ්ච, පුරෙ පච්ඡා විකාලෙ ච,
පඤ්චාහිකා සඞ්කමනී දුවෙ ආවසථෙන ච.

40. පසාඛෙ ආසනෙ චෙව තිංස එකූනකා ඉමෙ,
කායවාචා න චිත්තා තීහි ද්වාරෙහි ජායරෙ,
ද්වෙ සමුට්ඨානිකා සබ්බෙ කඨිනෙන සහා සමා.

41. එළකලොමා ද්වෙ සෙය්යං ආහච්ච පිණ්ඩභොජනං,
ගණ විකාල සන්නිධි දන්තපොණෙන චෙලකා.

42. උය්යුත්තං සෙනං උය්යොධී සුරා ඔරෙන නහායනා,
දුබ්බණ්ණෙ ද්වෙ දෙසනීයා ලසුණුපතිට්ඨෙ නච්චනා.

43. නහානං අත්ථරණං සෙය්යා අන්තො රට්ඨෙ තථා බහී,
අන්තොවස්සං චිත්තාගාරං ආසන්දිං සුත්තකන්තනා.

44. වෙය්යාවච්චං සහත්ථා ච අභික්ඛුකාවාසෙන ච,
ඡත්තං යානඤ්ච සඞ්ඝාණිං අලඞ්කාරං ගන්ධවාසිතං.

45. භික්ඛුනී සික්ඛමානා ච සාමණෙරී ගිහීනියා,
අසංකච්චිකා ආපත්ති චත්තාරීසා චතුත්තරී.

46. කායෙන න වාචා චිත්තෙන කායචිත්තෙන න වාචතො,
ද්වෙ සමුට්ඨානිකා සබ්බෙ සමා එළකලොමිකාති.

47. පදඤ්ඤත්ර අසම්මතා තථා අත්ථඞ්ගතෙන ච,
තිරච්ඡානවිජ්ජා ද්වෙ වුත්තා අනොකාසො ච පුච්ඡනා.

48. සත්ත සික්ඛාපදා එතෙ වාචා න කායචිත්තතො,
වාචා චිත්තෙන ජායන්ති න තු කායෙන ජායරෙ,
ද්වෙ සමුට්ඨානිකා සබ්බෙ පදසොධම්මසදිසා.

49. අද්ධානං නාවං පණීතං, මාතුගාමෙන සංහරෙ,
ධඤ්ඤං නිමන්තිතා චෙව අට්ඨ ච පාටිදෙසනී.

50. සික්ඛා පණ්ණරසා එතෙ කායා න වාචා න මනා,
කායවාචාහි ජායන්ති න තෙ චිත්තෙන ජායරෙ

51. කායචිත්තෙන ජායන්ති න තෙ ජායන්ති වාචතො,
කායවාචාහි චිත්තෙන සමුට්ඨානා චතුබ්බිධා.
පඤ්ඤත්තා බුද්ධඤාණෙන අද්ධානෙන සහා සමා.

52. ථෙය්යසත්ථං උපස්සුති සූපං විඤ්ඤාපනෙන ච,
රත්ති ඡන්නඤ්ච ඔකාසං එතෙ බ්යූහෙන සත්තමා.

53. කාය චිත්තෙන ජායන්ති න තෙ ජායන්ති වාචතො,
තීහි ද්වාරෙහි ජායන්ති ද්වෙ සමුට්ඨානිකා ඉමෙ,
ථෙය්යසත්ථසමුට්ඨානා දෙසිතාදිච්චබන්ධුනා.

54. ඡත්තපාණිස්ස සද්ධම්මං න දෙසෙන්ති තථාගතා,
තථෙව දණ්ඩපාණිස්ස, සත්ථආයුධපාණිනං.

55. පාදුකූපාහනා යානං සෙය්යපල්ලත්ථිකාය ච,
වෙඨිතො ගුණ්ඨිතො චෙව එකාදස මනූනකා.

56. වාචා චිත්තෙන ජායන්ති න තෙ ජායන්ති කායතො,
සබ්බෙ එකසමුට්ඨානා සමකා ධම්මදෙසනෙ.