54. ඡත්තපාණිස්ස සද්ධම්මං න දෙසෙන්ති තථාගතා,
තථෙව දණ්ඩපාණිස්ස, සත්ථආයුධපාණිනං.

55. පාදුකූපාහනා යානං සෙය්යපල්ලත්ථිකාය ච,
වෙඨිතො ගුණ්ඨිතො චෙව එකාදස මනූනකා.

56. වාචා චිත්තෙන ජායන්ති න තෙ ජායන්ති කායතො,
සබ්බෙ එකසමුට්ඨානා සමකා ධම්මදෙසනෙ.

57. භූතං කායෙන ජායති න වාචාය න චිත්තතො,
වාචතො ච සමුට්ඨාති න කායා න ච චිත්තතො

58. කායවාචාය ජායති න ච ජායති චිත්තතො,
භූතාරොචනකා නාම තීහි ඨානෙහි ජායති.

59. චොරිං වාචාය චිත්තෙන, න තං ජායති කායතො;
ජායති තීහි ද්වාරෙහි චොරිවුට්ඨාපනං ඉදං,
අකතං ද්විසමුට්ඨානං ධම්මරාජෙන භාසිතං.

61. ජායති වාචා චිත්තෙන න තං ජායති කායතො,
ජායති තීහි ද්වාරෙහි අකතං චතුඨානිකං.

62. සමුට්ඨානං හි සඞ්ඛෙපං දස තීණි සුදෙසිතං,
අසම්මොහකරං ඨානං නෙත්තිධම්මානුලොමිකං,
ධාරයන්තො ඉමං විඤ්ඤූ සමුට්ඨානෙ න මුය්හතීති.