49. අද්ධානං නාවං පණීතං, මාතුගාමෙන සංහරෙ,
ධඤ්ඤං නිමන්තිතා චෙව අට්ඨ ච පාටිදෙසනී.

50. සික්ඛා පණ්ණරසා එතෙ කායා න වාචා න මනා,
කායවාචාහි ජායන්ති න තෙ චිත්තෙන ජායරෙ

51. කායචිත්තෙන ජායන්ති න තෙ ජායන්ති වාචතො,
කායවාචාහි චිත්තෙන සමුට්ඨානා චතුබ්බිධා.
පඤ්ඤත්තා බුද්ධඤාණෙන අද්ධානෙන සහා සමා.

52. ථෙය්යසත්ථං උපස්සුති සූපං විඤ්ඤාපනෙන ච,
රත්ති ඡන්නඤ්ච ඔකාසං එතෙ බ්යූහෙන සත්තමා.

53. කාය චිත්තෙන ජායන්ති න තෙ ජායන්ති වාචතො,
තීහි ද්වාරෙහි ජායන්ති ද්වෙ සමුට්ඨානිකා ඉමෙ,
ථෙය්යසත්ථසමුට්ඨානා දෙසිතාදිච්චබන්ධුනා.

54. ඡත්තපාණිස්ස සද්ධම්මං න දෙසෙන්ති තථාගතා,
තථෙව දණ්ඩපාණිස්ස, සත්ථආයුධපාණිනං.

55. පාදුකූපාහනා යානං සෙය්යපල්ලත්ථිකාය ච,
වෙඨිතො ගුණ්ඨිතො චෙව එකාදස මනූනකා.

56. වාචා චිත්තෙන ජායන්ති න තෙ ජායන්ති කායතො,
සබ්බෙ එකසමුට්ඨානා සමකා ධම්මදෙසනෙ.

57. භූතං කායෙන ජායති න වාචාය න චිත්තතො,
වාචතො ච සමුට්ඨාති න කායා න ච චිත්තතො

58. කායවාචාය ජායති න ච ජායති චිත්තතො,
භූතාරොචනකා නාම තීහි ඨානෙහි ජායති.

59. චොරිං වාචාය චිත්තෙන, න තං ජායති කායතො;
ජායති තීහි ද්වාරෙහි චොරිවුට්ඨාපනං ඉදං,
අකතං ද්විසමුට්ඨානං ධම්මරාජෙන භාසිතං.

61. ජායති වාචා චිත්තෙන න තං ජායති කායතො,
ජායති තීහි ද්වාරෙහි අකතං චතුඨානිකං.

62. සමුට්ඨානං හි සඞ්ඛෙපං දස තීණි සුදෙසිතං,
අසම්මොහකරං ඨානං නෙත්තිධම්මානුලොමිකං,
ධාරයන්තො ඉමං විඤ්ඤූ සමුට්ඨානෙ න මුය්හතීති.